بەيرەسمي اقپاراتقا ساي اۋعانستاندا 45 مىڭ قازاق تۇرادى. بۇگىندە ولار كوشەگە شىعا الماي، ۇرەيمەن وتىرعانىن، ەلگە ورالعىسى كەلەتىنىن ايتادى، دەپ حابارلادى 31 تەلەارنا.  

تۇركىستاندىق مۇحامەد قۇربان 1968 جىلى اۋعانستاندا تۋىپ، جيىرما جىلداي سوندا تۇرعان. اۋعانستاندا سوعىس بولعان كەزدە يرانعا كوشىپ، 1993 جىلى قازاقستانعا ورالعان. ايتۋىنشا، ءقازىر اۋعانستاننىڭ التى قالاسىندا وتىزدان استام وتباسىندا ءجۇز ەلۋدەي قازاق ءومىر ءسۇرىپ جاتىر.

– گەرات، الينەۋ، قۇندىز، پۋلۋحۋمريدا، مازاري شاريفتە، شۇبىرعان قالالارىندا قازاقتار بار. ءاربىر قالانىڭ وزىندە ءۇش-تورت، بەس قازاق وتباسى قالعان، – دەيدى مۇحامەد قۇربان.

اۋعاننان كەلگەن ول سول جاقتاعى تۋىستارى جاعدايلارى قيىن ەكەنىن، كوشەگە شىعا الماي، قامالىپ وتىرعانىن، ءتىپتى نان الۋعا بارا الماي جاتقانىن جەتكىزگەنىن ايتادى. 

– جاعدايىمىز وتە قيىن دەيدى. تاليباندار يسلام زاڭىن جۇرگىزىپ جاتىر. ايەلدەر، قىزدار كوشەدە جۇرمەسىن، مەكتەپكە بارماسىن دەپ جاتىر، – دەيدى  مۇحامەد قۇربان. 

ءماجىلىس دەپۋتاتى ەرلان سايروۆ اۋعانستان بيلىگى قۇلاپ، دۇربەلەڭ باستالعالى ونداعى ەتنيكالىق قازاقتاردى ەلگە الدىرۋ قاجەت، جىراقتا جۇرگەن قانداستاردىڭ جاعدايىنا مەملەكەت بەي-جاي قاراماۋى ءتيىس دەپ ەسەپتەيدى.

– شەتەلدەگى ءاربىر قازاق ءۇشىن ءبىز كۇرەسۋىمىز كەرەك. مەنىڭ ويىمشا بۇل مەملەكەتتىڭ، ءاربىر مەملەكەتتىڭ ءوزىنىڭ ءبىر مورالدىق مىندەتى بار، – دەيدى ەرلان سايروۆ. 

ساراپشىلار قازاقتاردىڭ باسىم بولىگى وزبەكستان، جۇڭگو، رەسەيدە تۇراتىنىن ايتادى. سونداي-اق تۇركىمەنستان، يران جانە قىرعىز رەسپۋبليكاسىندا دا بار.

ال اۋعانستانداعى ءبىراز قازاق تۇركياعا كوشكەنىمەن، وندا قالعاندارى دا از ەمەس. ناقتى سانى تۋرالى رەسمي مالىمەت جوق.

ەلگە كەلگەن قانداستاردىڭ دەرەكقور بازاسىنداعى مالىمەتكە ساي، ءبىر جارىم ميلليون قازاق ەلگە ورالعان. ءقازىر شەتەلدە 5 ميلليونداي قازاق تۇرادى.