تاليباندار 20 جىلدان سوڭ كابۋلدى قايتا باسىپ الىپ اۋعانستان بيلىگىن قولدارىنا الدى. 17 شىلدە كۇنى تۇندە "تاليبان" ۇيىمىنىڭ نەگىزىن قالاۋشىلاردىڭ ءبىرى  "قاساپشى باردار" مەن ونىڭ دەلەگاسياسى ونداعان جىلدان كەيىن اۋعانستانعا  ورالدى. 53 جاستاعى باردار اۋعانستاننىڭ جاڭا باسشىسى بولادى دەپ كۇتىلۋدە. بۇل تۋرالى Son Dakika باسىلىمى حابارلادى.

اۋعانستانداعى اقش جانە ناتو اسكەر كۇشتەرىنىڭ كەتۋىمەن تالىپتەر ەل استاناسى كابۋلعا كىرىپ، بيلىكتى يەمدەنگەن. پرەزيدەنت اشراف عاني قاقتىعىس مەن قانتوگىس بولدىرماۋ ءۇشىن ەلدەن كەتكەنىن جاريالادى. بەيبىت تۇرعىندار ەلدەن قاشۋ ءۇشىن ءتىپتى ۇشاقتارعا جارماسىپ ولىممەن بەتپە-بەت كەلۋدە.

اۋعان ەلىن باسقاراتىن تاليبان كەشە باسپا ءسوز ءماسليحاتىن وتكىزىپ، ەلدە شاريعات شەڭبەرىندە ادام قۇقىقتارىنا، سونىڭ ىشىندە ايەل قۇقىعىنا قۇرمەت كورسەتىلەتىنىن مالىمدەدى. الايدا بۇعان كوپشىلىك كۇمانمەن قارايدى.

بريتانيالىق The Guardian باسىلىمى "تالىپتەر كابۋل اۋەجايىنا بارا جاتقان اۋعاندىقتارعا زورلىق-زومبىلىق كورسەتتى" دەپ حابارلادى. تالىپتەر اۋەجايداعى قاۋىپسىزدىككە ۋادە بەرگەنىنە قاراماستان، قاۋىپسىزدىك بەكەتتەرىندە ءوتىپ بارا جاتقاندا ايەلدەر مەن بالالاردى ۇرىپ-سوققان.

اقش-تا ورنالاسقان Fox News بۇقارالىق اقپارات قۇرالى تاليبان پاراندجا كيمەگەن ايەلدەردى ولتىرگەنى تۋرالى حابارلادى. 17 شىلدە كۇنى تاليباننىڭ "ءبىز ايەلدەردىڭ قۇقىقتارىن قۇرمەتتەيمىز" دەگەن مالىمدەمەسىنە قاراماستان، ولار كوپ ايەلدى ءولتىردى دەگەن اقپارات شىقتى.

قاساپشى بارادار اۋعانستانعا ورالدى

تاليبان قوزعالىسىنىڭ نەگىزىن قالاۋشىلاردىڭ ءبىرى – موللا وماردىڭ ولىمىنەن كەيىن 53 جاستاعى بارادار ەلدىڭ جاڭا باسشىسى بولادى دەپ كۇتىلۋدە.

– بۇگىن تۇستەن كەيىن كاتاردان اۋعانستان يسلام امىرلىگى كانداھار اۋەجايىنا بارادار باستاعان جوعارى دەڭگەيلى دەلەگاسيا كەلىپ قوندى، – دەدى  "تاليبان" ۇيىمىنىڭ وكىلى نايم. 

تاليبان قۇرىلعان كانداھار قالاسىندا تۋىپ وسكەن بارادار 1996-2001 جىلدار ارالىعىندا ۇيىمدا ءار ءتۇرلى قىزمەت اتقارعان.

اۋعانستانعا اقش كەلگەننەن كەيىن قاشىپ كەتكەن بارادار كەيىن پاكىستاندا تۇرمەگە جابىلعان. ءۇش جىل بۇرىن اقش ۇكىمەتىنىڭ تالابى بويىنشا بوساتىلعان بارادار سودان بەرى كاتار استاناسى دوحادا تۇرعان.