الماتى وبلىسىندا ەكى پوليسەي جول اپاتىنان كوز جۇمدى. بۇل تۋرالى وبلىستىڭ پوليسيا دەپارتامەنتى حابارلادى.
وقىس وقيعا 17 تامىز ساعات 22:00-دەر شاماسىندا "الماتى-وسكەمەن" تاسجولىندا بولعان. "Toyota Camry" اۆتوكولىگى سولتۇستىك باعىتتا ءجۇرىپ كەلە جاتقاندا الدىڭعى سول جاق دوڭگەلەگى تەسىلىپ، جەڭىل كولىك 90 گرادۋسقا اينالىپ، "Hyundai Accent" اۆتوكولىگىمەن سوقتىعىسقان.
سالدارىنان الماتى وبلىسى ىلە اۋداندىق پوليسيا ءبولىمىنىڭ 21 جاستاعى مۇحتار نۇرتىلەۋ جانە 23 جاستاعى سانجار وماربەك اتتى 2 قىزمەتكەرى وقيعا ورنىندا قازا تاپقان. ال ءۇشىنشى پوليسەي 21 جاستاعى ماقسات رامازان ءتۇرلى دەنە جاراقاتىمەن اۋرۋحاناعا جەتكىزىلگەن.
سونداي-اق وتەگەن باتىر كەنتىندەگى ورتالىق اۋرۋحاناعا ءتۇرلى جاراقاتتارمەن وسى كولىكتىڭ تاعى ءبىر جولاۋشىسى جەتكىزىلدى.
ءقازىر اتالعان ءىس قىلمىستىق كودەكستىڭ 345-بابى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋ) بويىنشا تىركەلگەن. ءتيىستى ساراپتامالار تاعايىندالعان.
پىكىر قالدىرۋ