ءبىلىم جانە عىلىم ءمينيسترى اسحات ايماعامبەتوۆ ورتا ءبىلىم بەرۋ ۇيىمدارى باسشىلارىن قولداۋ، قىزمەتكە تاعايىنداۋ ءتارتىبى، بىلىكتىلىكتى ارتتىرۋ جۇيەسى بويىنشا اتقارىلىپ جاتقان جۇمىستار تۋرالى ايتىپ بەردى.
مينيستر العاش رەت ءبىلىم بەرۋ ۇيىمدارىنىڭ باسشىلارى مەن ولاردىڭ ورىنباسارلارىنا اتتەستاتتاۋ جانە بىلىكتىلىك ساناتىن بەرۋ جۇيەسى ەنگىزىلىپ جاتقانىن، اتتەستاتتاۋ ءۇش جىلدا ءبىر رەت وتكىزىلىپ، ەكى كەزەڭنەن تۇراتىنىن ايتتى.
"ءبىرىنشى كەزەڭدە زاڭناما بويىنشا ءبىلىمىن تەكسەرۋگە ارنالعان جانە باسقارۋشىلىق قۇزىرەتتەرى بويىنشا تەست تاپسىرادى. ەكىنشى كەزەڭدە ءبىلىم بەرۋ ۇيىمدارىنىڭ باسشىلارى بەلگىلى ءبىر ۋاقىتتاعى اتقارعان جۇمىسىنىڭ تيىمدىلىگى باعالانادى. وقۋ مەڭگەرۋشىلەرى ءۇشىن اتتەستاتتاۋ تەستىلەۋسىز تەك ءبىر كەزەڭنەن تۇراتىنىن اتاپ وتكىم كەلەدى. اتتەستاتتاۋ ناتيجەلەرى بويىنشا كوميسسيا اتقاراتىن لاۋازىمىنا سايكەستىگى/سايكەس ەمەستىگى تۋرالى جانە ءۇش ساناتتىڭ بىرەۋىن بەرۋ تۋرالى شەشىم قابىلدايدى. ياعني، لاۋازىمىنا سايكەستىگى بەلگىلى بولسا، ديرەكتورعا سانات بەرىلەدى. كەرىسىنشە، لاۋازىمعا سايكەس ەمەس بولسا، ديرەكتور جۇمىستان بوساتىلۋى مۇمكىن. بەرىلگەن ساناتقا بايلانىستى ديرەكتور نەمەسە وقۋ ءىسىنىڭ مەڭگەرۋشىسى سانات ءۇشىن لاۋازىمدىق جالاقىدان 30%، 70%، 100% مولشەرىندە قوسىمشا اقى الاتىن بولادى. سونىمەن قاتار مەكتەپ ديرەكتورى مەن ونىڭ ورىنباسارلارىنىڭ لاۋازىمدىق جالاقىسى جىل سايىن 25%-عا ارتادى" دەپ جازدى مينيستر facebook پاراقشاسىندا.
ايماعامبەتوۆ بۇل شارالار مەكتەپ باسشىلىعىنىڭ جالاقىسىن مۇعالىمدەردىڭ ورتاشا جالاقىسىنىڭ دەڭگەيىنە جاقىنداتۋعا مۇمكىندىك بەرگەنىمەن، بۇل – مەكتەپ باسشىسى لاۋازىمىنا ەڭ مىقتى مامانداردى تارتۋ ءۇشىن جەتكىلىكسىز ەكەنىن اتاپ ءوتتى.
"باسشىلارعا ەڭبەكاقى تولەۋ جۇيەسىندە بۇرىن-سوڭدى ىنتالاندىرۋشى فاكتورلار بولعان جوق. كوشباسشىنىڭ جالاقىسى ونىڭ ءتيىمدى نەمەسە ءتيىمسىز بولۋىنا بايلانىسسىز بىردەي بولاتىن. سونىمەن قاتار مەكتەپتە 80 بالا وقيتىن ءبىلىم ورداسىنىڭ ديرەكتورى مەن 1200 بالا ءبىلىم الاتىن مەكتەپ ديرەكتورى بىردەي جالاقى الادى. ءقازىر ءبىز اتتەستاتتاۋدى جانە جۇمىس تيىمدىلىگى ءۇشىن قوسىمشا اقى تولەۋ جۇيەسىن ەنگىزىپ جاتىرمىز. سونداي-اق مەكتەپتىڭ جوبالىق قۋاتتىلىعىنا بايلانىستى لاۋازىمدىق جالاقىنى ديففەرەنسيالاۋدى ەنگىزۋ جوسپاردا بار. سوندىقتان الداعى ۋاقىتتا دا ءبىز مەكتەپتەردى ەڭ مىقتى پەداگوگتەردىڭ باسقارۋى ءۇشىن شارالار ۇسىناتىن بولامىز" دەدى مينيستر.
پىكىر قالدىرۋ