ءبىلىم جانە عىلىم ءمينيسترى اسحات ايماعامبەتوۆ مەكتەپ ديرەكتورلارىن تاعايىنداۋدىڭ جاڭا ءتارتىبىن تانىستىردى.
ءمينيستردىڭ سوزىنشە، ەندى مەكتەپ ديرەكتورلارى بىرنەشە تارتىپپەن تاعايىندالادى.
– بىرىنشىدەن مەكتەپ ديرەكتورىنىڭ مىندەتىن اتقارۋشىسى بولىپ 3 ايدان اسپايتىن جانە ءبىر رەتتەن ارتىق ەمەس مەرزىمدە عانا ىستەۋگە بولادى. وسى كەزەڭدە كونكۋرس وتكىزىلىپ، جاڭا باسشى تاعايىندالۋى كەرەك. مەكتەپ ديرەكتورىنىڭ بوس ورنى پايدا بولعاننان كەيىن، كونكۋرس تۋرالى حابارلاندىرۋ 7 جۇمىس كۇنى ىشىندە ءبىلىم باسقارماسىنىڭ رەسمي سايتىندا جانە اككاۋنتىندا ورنالاستىرىلۋى كەرەك. ديرەكتور ۋاقىتشا (بالا كۇتىمىنە بايلانىستى دەمالىس، وقۋ جانە ت.ب.) كەتەتىن بولسا دا كونكۋرس ارقىلى تاعايىنداۋ بولادى. جانە كونكۋرستى بۇرىنداعىداي اۋداندىق ءبىلىم بولىمدەرى ەمەس، وبلىستىق ءبىلىم باسقارمالارى وتكىزەتىن بولادى. بۇگىندە ەلىمىزدە مەكتەپ باسشىسى لاۋازىمىنا 700-دەن استام بوس جۇمىس ورنى بار، – دەدى ايماعامبەتوۆ.
بايقاۋدىڭ ءوزى بىرنەشە كەزەڭنەن تۇرادى:
- كانديداتتاردىڭ ديرەكتور لاۋازىمىنا قۇجاتتاردى تاپسىرۋى؛
- ءبىلىم باسقارماسىنداعى كادر قىزمەتىنىڭ كانديداتتىڭ بىلىكتىلىك تالاپتارىنا سايكەستىگىن باعالاۋى، كونكۋرسقا قاتىسۋعا رۇقسات بەرۋى؛
- ۇمىتكەرلەرگە ارنالعان ەلەكتروندىق تەستىلەۋ (باسقارۋشىلىق قۇزىرەتتەر، پەداگوگيكا، پسيحولوگيا، ق ر زاڭناماسى بويىنشا تەستىلەۋ)؛
- وقۋ ورنىنىڭ قامقورشىلىق كەڭەسىنىڭ الدىندا مەكتەپتىڭ دامۋ جوسپارىن قورعاۋ (تەستىلەۋدى ءساتتى تاپسىرعان جاعدايدا)؛
- ءبىلىم باسقارماسىنداعى اڭگىمەلەسۋ (قامقورشىلىق كەڭەسىنىڭ الدىندا مەكتەپتىڭ دامۋ جوسپارىن ءساتتى قورعاپ شىققان ۇمىتكەرلەر جىبەرىلەدى).
سونىمەن قاتار بولاشاق ديرەكتورلار مىندەتتى تۇردە مەنەدجمەنت كۋرستارىنان ءوتىپ، ءتيىستى سەرتيفيكاتتارى بولۋى كەرەك. جالپى پەداگوگيكالىق جۇمىس ءوتىلى كەمىندە 5 جىل بولۋى قاجەت.
بارلىق كەزەڭنەن وتكەن ۇمىتكەرمەن ءبىلىم ءبولىمى ءتيىستى ەڭبەك شارتىن جاساپ، ونى ديرەكتور ەتىپ تاعايىنداۋ تۋرالى بۇيرىق شىعارادى.
تاعى ءبىر جاڭاشىلدىق – كادر رەزەرۆىن قۇرۋ. العاشقى ەكى كەزەڭنەن (تەستىلەۋ جانە قامقورشىلىق كەڭەسپەن كەلىسۋ) ءساتتى وتكەن، ءبىراق ءبىلىم باسقارماسىندا اڭگىمەلەسۋدەن وتپەگەن كانديداتتار ەندى ءبىر جىلعا رەزەرۆكە الىنۋى مۇمكىن.
بۇل كانديداتتارعا مەكتەپتىڭ قامقورشىلىق كەڭەسىمەن كەلىسە وتىرىپ، ءبىر جىل ىشىندە ديرەكتور لاۋازىمىنا تاعايىندالۋ قۇقىعى بەرىلەدى.
