G7 ەلدەرى – ۇلىبريتانيا، كانادا، فرانسيا، گەرمانيا، يتاليا، جاپونيا جانە اقش اۋعانستاننان حالىقارالىق كۇشتەردى ەۆاكۋاسيالاۋ كۇنىن تالقىلاپ، بايدەندى ەۆاكۋاسيانىڭ اياقتالۋ كۇنىن ۇزارتۋعا كوندىرگىسى كەلدى. ۇلىبريتانيا پرەمەر-مينيسترى بوريس دجونسون فرانسيا پرەزيدەنتى ەممانۋەل ماكرون، گەرمانيا كانسلەرى انگەلا مەركەلمەن بىرگە ەۆاكۋاسيا مەرزىمىن ۇزارتۋ كەرەك ەكەنىن ايتتى. ءبىراق، اقش پرەزيدەنتى ولاردىڭ ءوتىنىشىن تويتارىپ، ءوز شەشىمىن "تەرروريستىك شابۋىل ءقاۋپىنىڭ ارتۋىمەن" بايلانىستىردى.
دجو بايدەن امەريكالىق كۇشتەردى اۋعانستاننان ەۆاكۋاسيالاۋدىڭ 31 تامىزعا دەيىن جالعاساتىنىن مالىمدەدى. دەگەنمەن، وپەراسيا تاليباننىڭ ىنتىماقتاستىعىنا بايلانىستى شارتتى جاعدايدا تابىستى جۇزەگە اساتىنىن ايتتى.
– ءبىز ەۆاكۋاسيانى 31 تامىزعا دەيىن اياقتايمىز دەپ وتىرمىز. نەعۇرلىم تەزىرەك اياقتاساق، سوعۇرلىم جاقسى. ءار ءبىر ارتىق وپەراسيا كۇنى ءبىزدىڭ اسكەرگە قوسىمشا ءقاۋىپ اكەلەدى. ءبىراق ەۆاكۋاسيانىڭ 31 تامىزعا دەيىن اياقتالۋى تالىپتەردىڭ ءوزارا سايكەسۋىنىڭ جالعاسۋىنا بايلانىستى، سونىمەن قاتار ءبىز الىپ كەتەتىن ادامداردىڭ اۋەجايعا كىرۋىنە رۇقسات بەرۋى ءتيىس جانە قىزمەتىمىزگە كەدەرگى كەلتىرمەۋى كەرەك، – دەدى بايدەن.
بايدەن پەنتاگون مەن مەملەكەتتىك دەپارتامەنتكە قاجەت بولعان جاعدايدا ەۆاكۋاسيا كەستەسىن وزگەرتۋدى سۇراعانىن ايتتى.
اقش پرەزيدەنتى بۇعان دەيىن بىرىككەن ۇلتتار ۇيىمى، ەۋروپالىق وداق جانە ناتو-داعى ارىپتەستەرىمەن كەزدەسكەنىن مالىمدەگەن.
فرانسيا ەۆاكۋاسيانى اياقتاۋ ءۇشىن كوبىرەك ۋاقىت قاجەت ەكەنىن ايتىپ، مەرزىم تاياعان سايىن الاڭداۋشىلىق بىلدىرگەن. گەرمانيا سىرتقى ىستەر ءمينيسترى حەيكو مااس ناتو وداقتاستارىمەن جانە تاليبانمەن كابۋل اۋەجايىن بەلگىلەنگەن مەرزىمنەن كەيىن دە اشىق ۇستاۋدى تالقىلاپ جاتقانىن ايتقان. ۇلىبريتانيا پرەمەر-مينيسترى بوريس دجونسون G7 سامميتىندە اقش اسكەرلەرىنىڭ اۋعانستاندا قالۋ مەرزىمىن ۇزارتۋدى سۇرايتىنىن مالىمدەگەن جانە اقش پرەزيدەنتى دجو بايدەن ەۆاكۋاسيا مەرزىمىن ۇزارتاتىن شەشىم شىعارادى دەپ كۇتىلگەن بولاتىن.
كەيىنىرەك، بايدەننىڭ ەڭ جوعارى تىڭشىسىن تاليبانمەن كەلىسسىوز جۇرگىزۋگە جىبەرگەنى حابارلانىپ، كەلىسسوزدىڭ "سوعىس جاعدايىندا" وتكەنى ايتىلعان. ال، تاليبان قوزعالىسىنىڭ وكىلى ەۆاكۋاسيالاۋ مەرزىمىن ۇزارتۋعا قارسى ەكەنىن جاريالاپ، ونىڭ "اۋىر سالدارى" بولاتىنىن ايتقان.
پىكىر قالدىرۋ