بايدەن 14 تامىزدان بەرى كابۋل اۋەجايىنان 70700 ادام ەۆاكۋاسيالانعانىن ايتتى. سەيسەنبىدە اقش-تىڭ "ۇلكەن جەتىلىك" بويىنشا وداقتاستارى بايدەننەن ەۆاكۋاسيا مەرزىمىن ۇزارتۋدى سۇراعان. بۇعان دەيىن بايدەننىڭ ءوزى دە تاليبان ۇيىمىمەن ەۆاكۋاسيالاۋ مەرزىمىن ۇزارتۋ بويىنشا كەلىسسوز ءجۇرىپ جاتقانىن جەتكىزگەن. اق ءۇيدىڭ باسپا ءسوز حاتشىسى دجەن پساكي ەۆاكۋاسيانى 31 تامىزدان كەيىن دە جالعاستىرۋ تاليبان ۇيىمى تاراپىنان قارسىلىق بولماعان جاعدايدا عانا جۇزەگە اساتىنىن ءمالىم ەتكەن. ءبىراق تاليبان ۇيىمىنىڭ وكىلى سۋحەيل شاحين اقش پەن ۇلىبريتانيا بەلگىلەنگەن مەرزىمدە اسكەرىن اۋعانستاننان شىعارماسا، سالدارى اۋىر بولاتىنىن ايتىپ، ەۆاكۋاسيانى جالعاستىرۋعا كەلىسپەدى.
سەيسەنبىدە كابۋلگە سرۋ ديرەكتورى ۋيليام بەرنس ۇشىپ بارعانى، تالىپتەر كوشباسشىلارىنىڭ ءبىرى ابدۋل عانيمەن كەزدەسەتىنىنى حابارلانعان. الايدا تالىپتەر اۋعانستاننان كەتكىسى كەلەتىندەر شەتەل اسكەرى ەلدەن شىعارىلعاننان كەيىن كوممەرسيالىق رەيستەر قالپىنا كەلتىرىلگەندە كەتە الاتىنىن ايتقان. ولار سونداي-اق اۋعانداردىڭ ەلدە قالعانىن قۇپ كورەتىنىن جەتكىزگەن.
ال ۇلىبريتانيا پرەمەر-مينيسترى بوريس دجونسون سەيسەنبىدە تالىپتەردى اۋعانستاننان كەتكىسى كەلەتىندەرگە 31 تامىزعا دەيىن دە، كەيىن دە كەدەرگى جاساماۋعا شاقىرعان.
وقي وتىرىڭىز:
♦ "ءۇنسىز قالمايمىز". تاليبان قوزعالىسى اقش پەن ۇلىبريتانياعا ەسكەرتۋ جاسادى
پىكىر قالدىرۋ