ءبىلىم جانە عىلىم ءمينيسترى اسحات ايماعامبەتوۆ قازاقستاندا جەكەمەنشىك جوعارى وقۋ ورنىن اشۋ – جاقسى تابىس كوزىنە اينالعانىن ايتتى.  

– ءبىز جاپقان ءبىر ۋنيۆەرسيتەتتىڭ قۇرىلتايشىسى، وقۋ ورنىنان تاباتىن قارجى كولەمى 4 ملرد تەڭگەدەن استام ەكەنىن ايتتى. بۇل – قىرۋار اقشا عوي. ءبىراق بىزگە كەرەگى ول – ساپا. ءبىز ءۇشىن وقۋ ورنى جەكەمەنشىك پە، مەملەكەتتىك ايىرماشىلىق جوق. كەرەگى – بولاشاق ماماندارعا ساپالى ءبىلىم بەرۋ. ەگەر ءتيىستى دەڭگەيدە ءبىلىم بەرىلىپ، ءتيىستى تالاپتار ورىندالىپ جاتسا، ءبىز ول وقۋ ورنىن قولدايمىز. ءتيىستى گرانتتار بەرەمىز. الايدا تەكسەرىس ناتيجەسىندە تالاپتارعا ساي كەلمەيتىن كوپتەگەن ۋينۆەرسيتەتتەر ليسەنزياسىنان ايىرىلىپ جاتىر. ەلدە پەدوگوگتەردى دايىندايتىن 86 ۋنيۆەرسيتەت بولعان. ونىڭ سانى – بار، ساپاسى – جوق. ءقازىر ولاردىڭ سانى 50-گە قىسقاردى. ءبىز ءالى دە ولاردىڭ سانىن ازايتامىز، – دەدى مينيستر.  

ايماعامبەتوۆتىڭ ايتۋىنشا، بۇگىندە 38 جوعارى وقۋ ورنى ليسەنزياسىنان ايىرىلعان.100 مىڭعا جۋىق ستۋدەنت باسقا ۋنيۆەرسيتەتكە اۋىسىپ جاتىر.

– تەكسەرىس توقتامايدى. ماقسات – ستۋدەنتتەرگە ساپالى ءبىلىم بەرۋ. وسى تەكسەرىستىڭ ناتيجەسىندە، كوپتەگەن وقۋ ورىندارى وزدەرىنىڭ ءبىلىم بەرۋ باعدارلامالارىن، ماتەريالدىق تەحنيكالىق بازاسىن جاڭارتىپ جاتىر. وقۋلىقتار ساتىپ الىپ جاتىر. ساباق، ەمتيحاندارىن ءتيىستى دەڭگەيدە وتكىزىپ جاتىر. بۇل – از ۋاقىت كولەمىندەگى جاقسى كورسەتكىش، – دەدى ول.