جامبىل وبلىسىنىڭ اكىمى بەردىبەك ساپاربايەۆ قازىرگى ۋاقىتتا تاراز ماڭىنداعى جارىلىستار توقتاعانىن جانە تۇرعىندارعا ۇيىنە قايتۋعا بولاتىنىن حابارلادى. 

ساپاربايەۆ جامبىل وبلىسى بايزاق اۋدانىندا جارىلىس سالدارىن جويۋ، كەلتىرىلگەن زالالدى انىقتاۋ جانە قالپىنا كەلتىرۋ جۇمىستارى جۇرگىزىلىپ جاتقانىن ايتتى.

اكىمنىڭ سوزىنشە، بارلىق مەملەكەتتىك ورگان وكىلدەرىنەن ايماقتىق جەدەل-شتاب قۇرىلعان. جارىلىس بولعان جەرگە جاقىن ماڭدا ءۇش اۋىل بار.

– ەڭ جاقىنى قاينار اۋىلى ءبىر شاقىرىم جەردە ورنالاسقان. قالعان ەكەۋى بەس شاقىرىم قاشىقتا. بۇل ەلدى مەكەندەردىڭ بارلىق تۇرعىنى ارنايى دايىندالعان 10 مەكتەپ پەن بەس كوللەدج جاتاقحاناسىنا ورنالاستىرىلدى. قازىرگى ۋاقىتتا مۇندا 227 ادام قالدى، ولاردىڭ كوپشىلىگى تۋىستارىنا كەتتى. قالپىنا كەلتىرۋ جۇمىستارىنا 1000-نان اسا ادام مەن 120-عا جۋىق تەحنيكا جۇمىلدىرىلدى، – دەدى اكىم.

اكىم تەمىرجول قوزعالىسىن قالپىنا كەلتىرۋ بويىنشا جۇمىستار جۇرگىزىلىپ جاتقانىن دا ايتتى. وقيعا ورنىندا ساپەرلەر رەلستەردى سناريادتاردىڭ ىقتيمال بولىكتەرىنەن تازارتۋ جۇمىستارىن جۇرگىزىپ جاتىر.

– توقايەۆتىڭ تاپسىرماسىنا سايكەس زارداپ شەككەن بارلىق ادامعا كومەك كورسەتىلەدى. زاڭعا سايكەس، قازا بولعانداردىڭ وتباسىنا مەملەكەتتەن كومەك بەرىلەدى. ەگەر زارداپ شەككەندەردىڭ اراسىندا مۇمكىندىگى شەكتەۋلى جاندار بولسا جانە ت.ب. نورماعا سايكەس كومەك كورسەتىلەدى. قيراعان ۇيلەر مەن نىساندارعا كەلەتىن بولساق، ساراپشىلار ءۇش ەلدى مەكەندى ارالاپ شىقتى، ورتەنگەن ۇيلەر مەن باسقا دا نىساندار تىركەلمەگەن. تەك شاتىرلار، تەرەزەلەر، ەسىكتەر سىنعان،– دەدى اكىم.