پرەزيدەنت قاسىم-جومارت توقايەۆتىڭ جارلىعىمەن مۇرات كارىباي ۇلى بەكتانوۆ قازاقستانىڭ قورعانىس ءمينيسترى لاۋازىمىنا تاعايىندالدى. بۇل تۋرالى توقايەۆتىڭ باسپا ءسوز حاتشىسى بەرىك ءۋالي facebook پاراقشاسىندا حابارلادى.

بۇعان دەيىن م.بەكتانوۆ قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى قىزمەتىن اتقارعان.

بەكتانوۆ مۇرات كارىباي ۇلى 1965 جىلى 18 قىركۇيەكتە سولتۇستىك قازاقستان وبلىسى سوكولوۆكا اۋىلىندا دۇنيەگە كەلگەن. 1988 جىلى كييەۆتىك جوعارى قارۋلى قولباسشىلىق ۋچيليششەسىن بىتىرگەن.

1989-1990 جىلدارى – موتواتقىشتار ۆزۆودىنىڭ كومانديرى، دەسانتتىق-شابۋىلداۋ ۆزۆودىنىڭ كومانديرى.

1990-1993 جىلدارى دەسانتتىق-شابۋىلداۋ باتالونىنىڭ بارلاۋ باستىعى بولعان.

2000 جىلى قازاقستان رەسپۋبليكاسى قارۋلى كۇشتەرى اسكەري اكادەمياسىن بىتىرگەن. 2000-2001 جىلدارى – توپ باستىعى، قازاقستان رەسپۋبليكاسى قارۋلى كۇشتەرى باس شتابىنىڭ جەدەل جوسپارلاۋ ءبولىمىنىڭ اعا وفيسەرى.

بۇعان دەيىن اتالعان قىزمەتتى نۇرلان ەرمەكبايەۆ اتقارعان. ول جامبىل وبلىسىنداعى جارىلىس بولعانىن ەستىگەن العاشقى ساتتە وتستاۆكاعا كەتۋ تۋرالى ويلاعانىن، وتستاۆكا تۋرالى ارىز جازاتىنىن مالىمدەگەن.

26 تامىز كۇنى جامبىل وبلىسى بايزاق اۋدانىندا ورنالاسقان اسكەري بولىمدە ساعات 19:00 شاماسىندا قويمالاردىڭ ءبىرىنىڭ جانىندا ءورت شىققان. ءورت سالدارىنان قويماداعى ءوق-دارى جارىلىپ، سالدارىنان 15 ادام قازا تاپقان. ولاردىڭ اراسىندا ءورت سوندىرۋشىلەر، توتەنشە جاعداي مينيسترلىگىنىڭ، اسكەري ءبولىمنىڭ، اسكەري كۇزەت پەن اسكەري پروكۋراتۋرانىڭ قىزمەتكەرلەرى بار. اسكەري بولىمنەن جارتى شاقىرىم جەردەگى قاينار اۋىلىنداعى ۇيلەر بۇلىنگەن.

جارىلىستان قازا تاپقانداردىڭ تولىق ءاتى-جونى تومەندەگىدەي:

ەفرەيتور ر.س.جانبولاتوۆ – 40 جاستا

سەرجانت م.س.مەرشىمباي – 40 جاستا

ستارشينا ە.ە.نادىربەكوۆ – 41 جاستا

ازاماتتىق قىزمەتكەر و.د.دالىبايەۆ – 59 جاستا

وڭتۇستىك ءوڭىردىڭ اسكەري پروكۋرورى ا.ق.قاپەزوۆ – 44 جاستا

سەرجانت-ورت ءسوندىرۋشى ا.س.تەمىربولاتوۆ – 28 جاستا

پولكوۆنيك م.ك.ايمانوۆ – 45 جاستا

پودپولكوۆنيك ا.ن.ميكروپۋلو – 50 جاستا

سەرجانت، اعا ءورت قۇتقارۋشىسى ە.ق.ساندىبايەۆ – 30 جاستا

سەرجانت، اعا ءورت قۇتقارۋشىسى ت.ق.تورەبەكوۆ – 40 جاستا

مايور س.ج.الىمبەكوۆ – 36 جاستا

مايور، قاراۋىل باسشىسى س.ۆ.زايكين – 41 جاستا

اعا سەرجانت، جۇرگىزۋشى گ.ج.قۋاتبەك – 26 جاستا

كىشى سەرجانت، ءورت قۇتقارۋشىسى ءا.ق.ادىلبەك – 25 جاستا

قاتارداعى ءورت ءسوندىرۋشى ءا.ب.كەڭەس – 22 جاستا