اقش اسكەرى اۋعانستاننان ءبىرجولاتا كەتتى. بۇل تۋرالى بي-بي-سي اقپارات اگەنتتىگى حابارلادى.

30 تامىز كۇنى اۋعانستاننان اقش اسكەرى  مەن ديپلوماتتار مىنگەن سوڭعى ۇشاق ۇشىپ شىقتى. 20 جىلداي اۋعان جەرىندە سوعىسقان اقش وسى ۋاقىت ىشىندە 2 مىڭنان استام جاۋىنگەرىنەن ايىرىلىپ، مىڭداعان ادامى جاراقات العان.

امەريكالىقتار كەتكەن بەتتە كابۋل اۋەجايىنا تالىپتەر باقىلاۋ ورناتتى.

وسىلايشا، اقش اۋعانستان يسلام رەسپۋبليكاسىنداعى 20 جىلعا جۋىق اسكەري وپەراسياسىن اياقتادى.

– بۇگىن اقش-تىڭ C-17 ۇشاعى حاميد كارزاي اۋەجايىننان ءبىرجولاتا ۇشىپ كەتتى. وسىلايشا اۋعانستاننان امەريكالىقتار مەن اۋعاندىقتاردى ەۆاكۋاسيالاۋ جۇمىستارى اياقتالدى. سونىمەن قاتار اقش ميسسياسىنىڭ اياقتالعانىن دا ايتقىم كەلەدى. كابۋلداعى حاميد كارزاي اتىنداعى اۋەجاي شەتەلدىك كۇشتەر باقىلاۋدا ۇستاعان سوڭعى نىسان بولاتىن. ەندى ول تالىپتەردىڭ ەنشىسىنە ءتيدى، – دەدى اقش ورتالىق قولباسشىلىعىنىڭ باسشىسى كەننەت ماكەنزي.

وسىعان وراي تالىپتەر اسپانعا وق اتىپ، اۋعانستاننىڭ تولىق تاۋەلسىزدىككە قول جەتكىزگەنىن ايتىپ، جار سالۋدا.