اقش پرەزيدەنتى دجو بايدەن پرەزيدەنت قاسىم-جومارت توقايەۆقا حات جولدادى. بۇل تۋرالى اقوردا سايتى حابارلادى.
– 29 تامىز كۇنى سەمەي يادرولىق پوليگونىنىڭ جابىلعانىنا 30 جىل تولۋىنا وراي امەريكا قۇراما شتاتتارىنىڭ اتىنان قازاقستان رەسپۋبليكاسىنىڭ حالقىنا ەڭ ىزگى قۇتتىقتاۋىمدى بىلدىرگىم كەلەدى.
اقش بۇرىنعى سىناق پوليگونى ايماعىن قالپىنا كەلتىرۋ مەن ونىڭ قاۋىپسىزدىگىن قامتاماسىز ەتۋ بويىنشا ءسىزدىڭ ۇكىمەتىڭىزبەن اراداعى جالعاسىپ جاتقان ىنتىماقتاستىقتى قوسا العاندا، قازاقستانمەن بەرىك سەرىكتەستىگىن نىعايتا بەرمەك.
امەريكا قۇراما شتاتتارى قازاقستاننىڭ تاۋەلسىزدىك العان العاشقى كۇنىنەن باستاپ سەمەي ايماعىندا ارىپتەستىك قارىم-قاتىناستا جۇمىستار اتقارىپ كەلەدى، – دەپ جازدى اقش پرەزيدەنتى.
دجوزەف بايدەن قاۋىپ-قاتەرلەردى بىرلەسىپ تومەندەتۋگە باعىتتالعان نانن-لۋگار باعدارلاماسى اياسىندا كەڭەستىك يادرولىق سىناق ينفراقۇرىلىمىنان قالعان مۇرانى جويۋ جولىندا قازاقستان مەن اقش-تىڭ بىرىگىپ جۇمىس اتقارعانىن ەسكە الىپ، ەكى ەلدىڭ دوستىعىن اتاپ ءوتتى.
"اقش ءسىزدىڭ ەلىڭىزدى دوس دەپ ماقتانا ايتادى جانە مەن سەرىكتەستىگىمىزدىڭ الەۋەتىن تولىق ءارى جەمىستى ىسكە اسىرۋ ءۇشىن "سىزبەن جۇمىس ىستەۋگە دايىنمىن" دەلىنگەن جەدەلحاتتا.
پىكىر قالدىرۋ