قيىن ومىرلىك جاعدايعا تاپ بولعان نەمەسە زورلىق-زومبىلىققا ۇشىراعان وتباسى مەن بالالارى بار ءانالاردى قولداۋ بويىنشا «Nur Otan» پارتياسىنىڭ سايلاۋالدى ۋادەلەرى اياسىندا ەلىمىزدىڭ ءار قالاسى مەن اۋدانىندا 234 ورتالىق اشۋ ماسەلەسى وتباسى، ايەلدەر جانە بالالاردىڭ قۇقىقتارىن قورعاۋ ماسەلەلەرى جونىندەگى رەسپۋبليكالىق قوعامدىق كەڭەستىڭ وتىرىسىندا قارالدى، دەپ حابارلايدى پارتيانىڭ باسپا ءسوز قىزمەتى.

كەڭەس ءتوراعاسى، ءماجىلىس دەپۋتاتى دينارا زاكييەۆانىڭ ايتۋىنشا، بۇگىندە «باقىتتى وتباسى» پارتيالىق جوباسى اياسىندا قيىن جاعدايعا تاپ بولعان 80 مىڭنان استام وتباسىعا كومەك كورسەتىلدى.

«جول كارتاسىنا سايكەس ەلىمىز بويىنشا 2،3 مىڭ جەدەل ارەكەت ەتۋ توبى جۇمىس ىستەيدى. بيىلعى جىلدىڭ ءبىرىنشى جارتىجىلدىعىندا 17 مىڭنان استام وتباسىعا كومەك كورسەتىلدى. وسىلايشا، 10 مىڭ ادام جۇمىسقا ورنالاستى. تاعى 4،5 مىڭ ادامعا ءتۇرلى قۇجاتتاردى راسىمدەۋدە زاڭگەرلىك جانە كونسۋلتاتيۆتىك كومەك كورسەتىلدى. «باقىتتى وتباسى» جوباسى اياسىندا اقمولا، اقتوبە، الماتى، جامبىل جانە پاۆلودار وبلىستارى ۇزدىك ناتيجە كورسەتتى»، - دەدى ول.

ونىڭ ايتۋىنشا، پارتيالىق جوبانى جۇزەگە اسىرۋدىڭ ماڭىزدى باعىتتارىنىڭ ءبىرى بالالارعا قوسىمشا ءبىلىم بەرۋ ۇيىمى. وسىلايشا، جوبانىڭ ارقاسىندا از قامتىلعان وتباسىلاردان شىققان 17،3 مىڭ بالا باسسەيندەر مەن سپورت كلۋبتارىنا تەگىن بارۋ مۇمكىندىگىنە يە بولدى.

«بۇل رەتتە قوسىمشا ءبىلىم بەرۋ مەكەمەلەرىندەگى جاعدايلار مەن ولار كورسەتەتىن قىزمەتتەردىڭ ساپاسىنا كوڭىل ءبولۋ ماڭىزدى. قازىرگى ۋاقىتتا مادەنيەت جانە سپورت مينيسترلىگى بالالارعا ارنالعان مەملەكەتتىك شىعارماشىلىق جانە سپورتتىق تاپسىرىستار تەتىگىن ەنگىزۋ بويىنشا جۇمىس جۇرگىزۋدە. ناتيجەسىندە 2021 جىلى شىعارماشىلىق ۇيىرمەلەر مەن سپورت سەكسيالارىندا تەگىن ساباقتارعا 83 مىڭعا جۋىق بالا قاتىسا الادى. ءبىراق وڭىرلەردە قوسىمشا ءبىلىم بەرۋ مەكەمەلەرىندە كوپتەگەن اقاۋلار بار. اتاپ ايتقاندا، شىرىك قابىرعالار، بالالار مەن جاسوسپىرىمدەردىڭ سپورت مەكتەپتەرىندە، دەنە شىنىقتىرۋ-ساۋىقتىرۋ، اۋلا كلۋبتارى تولىعىمەن قامتاماسىز ەتىلمەگەن. ءبىز مەملەكەتتىك ورگاندارمەن جانە پارتيا فيليالدارىمەن پروبلەمالىق نىساندار بويىنشا جۇمىس ىستەپ، جوندەۋ جۇمىستارىن جۇرگىزدىك. ءقازىر بارلىق قوسىمشا ءبىلىم بەرۋ مەكەمەلەرىنە مونيتورينگ جۇرگىزىپ، ەگجەي-تەگجەيلى جۇمىس جوسپارىن جاساۋ ارقىلى شارالار قابىلداۋ قاجەت»، – دەپ تولىقتىردى دينارا زاكييەۆا.

ول سونداي-اق كەڭەس جۇمىسىنىڭ قورىتىندىسى بويىنشا 23 بالالاردى وڭالتۋ ورتالىعىنا جوندەۋ جۇمىستارى جۇرگىزىلەتىنىن اتاپ ءوتتى. 

«الدىڭعى وتىرىستا كەڭەس وڭالتۋ ورتالىقتارىنىڭ جاعدايىنا مونيتورينگ جۇرگىزۋ ءۇشىن بارلىق ءوڭىردىڭ اكىمدىكتەرىنە جۇگىندى. ناتيجەسىندە انىقتالعان ەسكەرتۋلەردى جويۋ ءۇشىن ماتەريالدىق-تەحنيكالىق بازانى جوندەۋگە جانە جاقسارتۋعا قاراجات بولىنەدى»، – دەدى ول.

اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتىنىڭ ءتوراعاسى شاحماردان بايمانوۆ وتباسىن قولداۋ، وتباسىلىق جانجالداردى شەشۋ جانە بالالارى بار ايەلدەرگە ۋاقىتشا تۇرۋعا ۇسىنۋ ءۇشىن 2025 جىلعا دەيىن 234 ورتالىق اشۋ بويىنشا جۇرگىزىلىپ جاتقان جۇمىس تۋرالى ايتتى.

«سول ورتالىقتاردىڭ قىزمەتتەرىن ۇزدىكسىز ۇسىنۋ ءۇشىن 2022 جىلدان باستاپ وڭىرلەردە جەرگىلىكتى بيۋدجەت ەسەبىنەن، ونىڭ ىشىندە مەملەكەتتىك الەۋمەتتىك تاپسىرىس ارقىلى ءتيىستى قاراجات قاراستىرۋ كوزدەلىپ وتىر. بىزدە اكىمدىكتەرمەن كەلىسىم-حاتتار بار»، – دەدى شاحماردان بايمانوۆ.

پارتيانىڭ باسپا ءسوز قىزمەتىنىڭ حابارلاۋىنشا، كەزدەسۋدە جەكەمەنشىك بالاباقشادا تاياق جەگەن 5 جاسار الماتىلىق ءبۇلدىرشىننىڭ اناسى دا ءسوز سويلەدى. ول كوپتەگەن ءتارتىپ بۇزۋشىلىقتار تۋرالى ايتىپ، شاعىن جانە ورتا بيزنەستى تەكسەرۋگە ءموراتورييدىڭ كەسىرىنەن مەملەكەتتىك ورگاندار جەكەمەنشىك بالاباقشالاردىڭ قىزمەتىن تەكسەرە المايتىنىن اتاپ ءوتتى. بۇل ماسەلەنى كەڭەس مۇشەلەرى جەكە وتىرىستا قارايتىن بولادى.