اۋعانستاندا بيلىكتى باسىپ العان ءتالىپ باسشىلارىنىڭ اراسىندا كيكىلجىڭ تۋدى، دەپ حابارلادى بي-بي-سي اقپارات اگەنتتىگى.
وتكەن اپتادا كابۋلداعى پرەزيدەنت سارايىندا "تاليبان" ۇكىمەتىندە پرەمەر-مينيستردىڭ ورىنباسارى بولىپ تاعايىندالعان ابدۋل گاني بارادار مەن بوسقىندار ىستەرى جونىندەگى مينيستر حاليل راحمان حاككاني سوزگە كەلىپ قالعان.
ەكى شەنەۋنىك تالىپتەردىڭ بيلىك باسىنا كەلۋىندە كىم ماڭىزدى ءرول اتقاردى دەگەن ماسەلە توڭىرەگىندە ءبىر توقتامعا كەلە الماعان.
– بۇل – كاتاردا اقش-پەن كەلىسسوز جۇرگىزگەن توپتىڭ ەڭبەگى، – دەدى پرەمەر-مينيستردىڭ ورىنباسارى بارادار.
ال مينيستر حاككانيدىڭ ايتۋىنشا، بۇل اۋعان جەرىندەگى قارۋلى توپتار قيمىلىنىڭ ارقاسى ەكەندىگىن ايتىپ، ول ءوزىنىڭ سوڭعى جىلدارداعى لاڭكەستىك ارەكەتتەرىن مەڭزەگەن.
جانجالدان كەيىن بارادار كابۋلدان كانداگارعا كەتىپ قالعان. الايدا تالىپتەر جانجالدى جوققا شىعارىپ وتىر.
تاليبان قوزعالىسى وتكەن ايدا اۋعانستاندى "يسلام امىرلىگى" دەپ جاريالاپ، ۋاقىتشا ۇكىمەت قۇردى. ۇكىمەت قۇرامى تەك ەر ادامدار مەن تالىپتەردىڭ قايراتكەلەرىنەن تۇرادى. بۇل ادامداردىڭ كەيبىرەۋلەرى سوڭعى 20 جىل ىشىندە اقش كۇشتەرىنە جاسالعان شابۋىلدارعا قاتىسقان.
پىكىر قالدىرۋ