بۇگىن ءماجىلىستىڭ جالپى وتىرىسىندا بالانىڭ قۇقىقتارىن قورعاۋ ماسەلەلەرىنە قاتىستى دەپۋتاتتاردىڭ باستاماسىمەن ازىرلەنگەن زاڭ جوباسى ءبىرىنشى وقىلىمدا ماقۇلداندى.

وتىرىس بارىسىندا دەپۋتاتتار مەن مەملەكەتتىك ورگان وكىلدەرى بالالاردىڭ قۇقىقتارىن قورعاۋعا قاتىستى پىكىر الماسىپ، زاڭ جوباسىن جان-جاقتى تالقىلادى. 

ءماجىلىس ءتوراعاسى نۇرلان نىعماتۋلين دەپۋتاتتاردىڭ باستاماسىمەن ازىرلەنگەن زاڭ جوباسىندا بالالاردىڭ تۇرعىن ءۇي جانە وتباسىلىق جاعدايدا مۇددەلەرىن قورعاۋعا، قاداعالاۋسىز جانە پاناسىز قالۋدىڭ الدىن الۋ ماسەلەلەرى قاراستىرىلعانىن اتاپ ءوتتى.

نۇرلان ءنىعماتۋليننىڭ ايتۋىنشا، سونىڭ ىشىندە، بۋللينگ پەن  كيبەربۋللينگ قوعامدا قاتتى الاڭداۋشىلىق تۋدىرىپ وتىر. بالالاردى وسى قاۋىپتەن قورعايتىن ناقتى نورمالار قاجەت.

ساندى مالىمەتكە جۇگىنسەك، 18 جاسقا دەيىنگى جاستار اراسىندا وتكەن جىلى 143 سۋيسيد جانە 306 وز-وزىنە قول جۇمساۋعا ارەكەت ەتۋ جاعدايى بولعان. تەك جارتى جىلدىڭ ىشىندە 105 سۋيسيد پەن 193 وزىنە قول سۇعۋ ارەكەتى بولعان.

– شىنىمەن بۋللينگ جانە كيبەربۋللينگ دەگەن – ول وتە ءقاۋىپتى نارسە. ول بالالاردىڭ پسيحولوگياسىن بۇزاتىن، سۋيسيدكە الىپ  باراتىن  جول. سوندىقتان، جاڭا ايتىپ كەتكەندەي، بالالاردى، اسىرەسە، مەكتەپ بالالاردى، بۋللينگ  جانە  كيبەربۋللينگتەن  تولىقتاي قورعايتىن ناقتى نورمالار ەنگىزۋىمىز كەرەك. وسىعان بايلانىستى، ەكىنشى وقىلىمعا دەيىن ءتيىستى جۇمىس وتكىزۋ قاجەت، - دەدى پالاتا سپيكەرى.

نۇرلان ءنىعماتۋليننىڭ ايتۋىنشا، بۇل زاڭ جوباسى قازىرگى قوعامعا قاجەتتى كوپتەگەن ماسەلەلەردى، اسىرەسە، بالالاردىڭ قۇقىعىن قورعاۋ جولىنداعى پروبلەمالاردى شەشۋگە ءتيىس.

پالاتا سپيكەرى اتاپ وتكەندەي، ءقازىر بالالاردى قورعاۋ ءۇشىن وتباسىلىق قاتىناستار، ءبىلىم بەرۋ، دەنساۋلىق ساقتاۋ سالالارىندا قوسىمشا شارالار قاراستىرىلدى. زاڭ جوباسىندا جازىلعان نورمالار، سونىڭ ىشىندە ينتەرنەتتە ازاماتتاردى، اسىرەسە، بالالاردى وسىنداي بۋللينگ جانە كيبەربۋللينگ سياقتى قۇبىلىستاردان قورعاۋ كەرەك.

بۇل نورمالار زامان تالابى ەكەنىن ايتقان نۇرلان نىعماتۋلين وسى زاڭ جوباسى مەملەكەت باسشىسى قاسىم-جومارت كەمەل ۇلى توقايەۆتىڭ ازاماتتاردى ينتەرنەت ارقىلى قىسىم كورسەتۋدەن زاڭ دەڭگەيىندە قورعاۋ جونىندەگى تاپسىرماسىن ورىنداۋعا باعىتتالعانىن .ايتتى.  

سونىمەن قاتار، ءماجىلىس ءتوراعاسىنىڭ پىكىرىنشە، ءبىر عانا زاڭ جوباسىمەن بالالاردىڭ قۇقىقتارىن قورعاۋ سالاسىنداعى پروبلەمالاردى شەشۋ مۇمكىن ەمەس.

– بۇل جەردە، ارينە، جۇيەلى شارالار، كەشەندى تاسىلدەر قاجەت. ول ءۇشىن، بارلىق مۇددەلى مەملەكەتتىك ورگانداردىڭ، پەداگوگتار مەن اتا-انالار قاۋىمىنىڭ بىرلەسكەن جۇمىسى قاجەت. ال، دەپۋتاتتىق كورپۋس ءوز تاراپىنان بالالاردىڭ قۇقىقتارىن قورعاۋ تەتىگىن جەتىلدىرۋ بويىنشا زاڭنامالىق جاعىنان قولداۋ كورسەتۋگە دايىن، - دەدى نۇرلان نىعماتۋلين.

ايتا كەتۋ كەرەك، زاڭ جوباسىمەن جۇمىس ىستەۋ بارىسىندا بالالاردىڭ تۇرعىنجايعا قۇقىقتارىن قامتاماسىز ەتۋگە، سونداي-اق وتباسىلىق قاتىناستاردا بالانىڭ مۇددەلەرىن قورعاۋعا جانە ينتەرنەت جەلىسىندەگى قۇقىققا قارسى كونتەنتتىڭ الدىن الۋعا ارنالعان ءبىرقاتار نورمالار قاراستىرىلدى.