دارىگەرلەر تارازداعى ايالدامالاردىڭ بىرىندە بولعان جول اپاتى كەزىندە زارداپ شەككەندەردىڭ جاعدايى تۋرالى ايتتى.

دارىگەرلەردىڭ ايتۋىنشا، 15 قىركۇيەكتە ساعات 07.00 شاماسىندا جەدەل جاردەم ستانسياسىنا قوڭىراۋ تۇسكەن. مىڭبۇلاق ىقشاماۋدانىنداعى اپاتتان زارداپ شەككەندەرگە مەديسينالىق كومەك كورسەتۋ قاجەت بولعان.

بارلىعى ءتورت ادام زارداپ شەكتى. ونىڭ ىشىندە 58 جاستاعى ايەلدىڭ ءقازىر جاعدايى اۋىر، جانساقتاۋ بولىمىندە جاتىر. ومىرتقاسى مەن 5 قابىرعاسى سىنىپ، باس سۇيەگىنە زاقىم كەلگەن.

ەكىنشى زارداپ شەگۋشى 28 جاستاعى جىگىت. جاراقاتى اسا اۋىر بولماعاندىقتان العاشقى جاردەمنەن كەيىن ۇيىنە جىبەرىلگەن.

ايتا كەتەيىك، بۇگىن تاراز قالاسىندا ساعات تاڭعى 7-لەر شاماسىندا جول-كولىك وقيعاسى بولدى. قاتتى جىلدامدىقپەن كەلگەن كولىك ايالداماعا شىعىپ، اۆتوبۋسقا كىرگەلى تۇرعان ادامداردى باسىپ كەتكەن. سالدارىنان 2 جاياۋ جۇرگىنشى وقيعا ورنىندا قايتىس بولدى، 2 ادام تاراز قالالىق №1 اۋرۋحاناسىنا جاتقىزىلعان بولاتىن.

ءقازىر پوليسەيلەر تاراز قالاسىنىڭ تۇرعىنى بولىپ تابىلاتىن 23 جاستاعى جۇرگىزۋشىنى انىقتاپ، ۇستادى. 

ءقازىر اتالعان فاكت بويىنشا قىلمىستىق كودەكستىڭ 345-بابى 4-بولىگى (ابايسىزدا ەكi نەمەسە ودان دا كوپ ادامنىڭ ءولiمiنە اكەپ سوققان ىس-ارەكەت) بويىنشا سوتقا دەيىنگى تەرگەۋ باستالدى.