ەلىمىزدە مەديسينالىق قۇرال-جابدىقتار، مەديسينالىق جيھازدار مەن مەديسينالىق كولىكتەر شىعاراتىن كاسىپورىننىڭ ءبىرى «كازمەدپريبور» ج ش س شىمكەنتتە ورنالاسقان.

كاسىپورىن 2005 جىلى قۇرىلعان. جىل باسىنان «كازمەدپريبور» جاۋاپكەرشىلىگى شەكتەۋلى سەرىكتەستىگى 120 مىڭ ليتردەن استام دەزينفەكسيالىق زاتتار، 6 مىڭنان استام مەديسينالىق جيھاز بەن 25 جەدەل جاردەم كولىگىن جاساپ شىعاردى. قازىرگى تاڭدا مەكەمەدە 100-گە تارتا قىزمەتكەر جۇمىس ىستەيدى.

شىمكەنتتە ىندەتتىڭ ىقتيمال تولقىنىنا دايىندىق ماقساتىندا كاسىپورىن وكپەنى جاساندى جەلدەتەتىن قۇرىلعى جاساپ جاتىر. مەديسينالىق اپپاراتتى شىعارۋعا امەريكا جانە جاپونيا وكىلدەرى سەرىكتەس بولۋدا. ءقازىر كاسىپورىننىڭ كۇنىنە 20 قۇرىلعى جاساۋعا مۇمكىندىگى بار. العاشقى 100 قۇرىلعى شىمكەنت قالاسىنا ورناتىلعان.