قازاقستاندا بيىلعى سەگىز ايدا ەت باعاسى 7،4 پايىزعا قىمباتتادى. بۇل تۋرالى energyprom.kz اقپارات اگەنتتىگى حابارلادى.

ەڭ قاتتى قىمباتتاعان – قوي ەتى، ونىڭ باعاسى 14،6 پايىزعا، جىلقى ەتىنىڭ باعاسى 9،4 پايىزعا ءوستى. ال سيىر ەتىنىڭ باعاسى 7،8 پايىزعا، قۇس ەتى 3،2 پايىزعا قىمباتتاعان.

تامىز ايىندا دۇكەندەر مەن بازارلاردا سۇيەگى بار سيىر ەتىنىڭ باعاسى ءبىر كەلىسى ءۇشىن ورتاشا ەسەپپەن 2200 تەڭگە تۇرعان. جىلقى ەتىنىڭ كەلىسى 2500 تەڭگە، قوي ەتى – 2400 تەڭگە.

ستاتيستيكا بويىنشا قاڭتار-تامىز ارالىعىندا ەت ءوندىرۋ كولەمى 43 مىڭ توننانى قۇرادى. بۇل وتكەن جىلدىڭ 8 ايىنداعى كورسەتكىشتەن 4،6 پايىزعا از. ال قۇس ەتىن ءوندىرۋ، كەرىسىنشە، 4،3 پايىزعا ارتىپ، 71،6 مىڭ تونناعا جەتتى.

باعانىڭ وسۋىنەن كەيىن ەلدە ەت تۇتىنۋ تومەندەدى. ءبىرىنشى جارتىجىلدىق قورىتىندىسى بويىنشا قوي ەتىن تۇتىنۋ جان باسىنا شاققاندا 2،5 كەلىگە دەيىن (10،6 پايىزعا)، تاۋىق ەتى 2،2 كەلىگە (4،4 پايىز) دەيىن تومەندەدى. سيىر ەتىن تۇتىنۋ جان باسىنا شاققاندا 11،9 كەلىگە دەيىن (0،9 پايىزعا) وسكەن.