دەنساۋلىق ساقتاۋ ءمينيسترى الەكسەي سوي ۇكىمەتتىڭ كەڭەيتىلگەن وتىرىسىندا ەلدە كوروناۆيرۋس ينفەكسياسىن جۇقتىرۋشىلار 36 پايىزعا تومەندەگەنىن مالىمدەدى. 

– قازاقستاندا كوروناۆيرۋسپەن اۋىرۋ كورسەتكىشى سوڭعى 2 اپتادا 36 پايىزعا تومەندەدى. 1 تامىزدان باستاپ ەلىمىزدە ينفەكسيالىق توسەك-ورىندار جۇكتەمەسى 56-دان 33 پايىزعا، رەانيماسيالىق توسەك-ورىن جۇكتەمەسى 45-تەن 32 پايىزعا تومەندەدى. ەلدە 57 كوۆيدتىك ستاسيونار جابىلدى، –  دەدى ول. 

ءمينيستردىڭ سوزىنشە، 23 تامىزدان بەرى تاۋلىگىنە كوروناۆيرۋستان ساۋىعىپ شىققاندار سانى ارتىپ كەلەدى.

سونىمەن قاتار كوروناۆيرۋس جۇقتىرۋ كورسەتىشى ددسۇ ەۋروپالىق وڭىرلىك بيۋروسىنا كىرەتىن 32 ەلدە تومەندەگەن. اتاپ ايتقاندا يسپانيادا – 57، شۆەيساريا، فرانسيا جانە ازەربايجاندا – 40، قىرعىزستاندا – 36، گرۋزيادا – 32، يتاليادا – 28، يزرايلدە – 21، گەرمانيادا 18 پايىزعا ازايعان.

ءقازىر قازاقستاننىڭ 4 ءوڭىرى – جامبىل، قىزىلوردا، ماڭعىستاۋ جانە تۇركىستان وبلىستارى "جاسىل" ايماقتا تۇر.

ال سەگىز ءوڭىر – شىمكەنت، الماتى، اتىراۋ، اقتوبە، قوستاناي، شىعىس قازاقستان، باتىس قازاقستان جانە سولتۇستىك قازاقستان وبلىستارى "سارى" ايماقتا ورنالاسقان. 

قالعان 5 ءوڭىر "قىزىل" ايماقتا.