وتكەن اپتادا اقش جۋىردا كوروناۆيرۋسقا قارسى ۆاكسينا سالدىرعان ساياحاتشىلار ءۇشىن ەل ەسىگى ايقارا اشىلىپ، پاندەميا باستالعالى ەنگىزىلگەن شەكتەۋ شارالارى جەڭىلدەتىلەتىنىن مالىمدەدى. الايدا قاراشا ايىندا كۇشىنە ەنەتىن ەرەجەگە ساي، ەلگە تەك دۇنيەجۇزىلىك دەنساۋلىق ساقتاۋ ۇيىمى تاراپىنان ماقۇلدانعان ۆاكسينالاردى ەككىزگەن ازاماتتار عانا كىرە الادى. بۇل ددسۇ-نان تىركەۋدەن وتپەگەن رەسەيلىك Sputnik V ۆاكسيناسىن سالدىرعان ميلليونداعان ادام ءۇشىن كەدەرگى بولىپ وتىر، دەپ جازادى Washingtonpost باسىلىمى.

قازىرگى تاڭدا ددسۇ امەريكالىق Pfizer، Moderna جانە قىتايلىق Sinopharm مەن Sinovac ۆاكسينالارىن تىركەگەن. سوڭعى ەكى ۆاكسينا قازاقستاندا قولدانىلاتىن ۆاكسينا تىزىمىندە بار. ال رەسەيلىك Sputnik V مەن وتاندىق QazVac حالىقارالىق ۇيىمدا تىركەلمەگەن.

قىركۇيەكتىڭ باسىندا ددسۇ ميسسياسى قازاقستانعا QazVac ۆاكسيناسىن تىركەۋ ماسەلەسى بويىنشا كەلەتىنى حابارلانعان. ازىرگە ءىس بارىسى تۋرالى مالىمەت جوق.

ال جاھاندىق دەنساۋلىق ساقتاۋ اگەنتتىگى رەسەيدەگى وندىرىستىك تاجىريبە مەن ونەركاسىپ ورىندارىنا، سونداي-اق قاجەتتى ستاندارتتارعا ساي تۇراقتى ۆاكسينا ءوندىرىسى مۇمكىندىگىنە الاۋداۋشىلىق ءبىلدىرىپ، وسى اپتادا رەسەيلىك ۆاكسينانى تەكسەرۋدى توقتاتقانىن ءمالىم ەتتى. 

ديۋك ۋنيۆەرسيتەتى جانىنداعى دەنساۋلىق ساقتاۋ سالاسىنداعى جاھاندىق يننوۆاسيا ورتالىعى الەم بويىنشا Sputnik ۆاكسيناسىنىڭ 448 ميلليون دوزاسى ساتىلعانىن اتاپ ءوتتى. 

اقش-تاعى جاڭا ەرەجە بويىنشا Sputnik ۆاكسيناسىنان بولەك، ءۇندىستاندىق كوۆاكسينا ۆاكسيناسىن سالدىرعاندار دا اقش اۋماعىنا كىرە المايدى. بۇگىندە اتالعان ۆاكسينانىڭ 560 ميلليون دوزاسى ساتىلعان.