ءماجىلىس ءتوراعاسى نۇرلان نىعماتۋلين تۇركىستان قالاسىندا ءوتىپ جاتقان تۇركىتىلدەس مەملەكەتتەر پارلامەنتتىك اسسامبلەياسىنىڭ ح پلەنارلىق وتىرىسى اياسىندا ۆەنگريا، قىرعىزستان پارلامەنتتەرى سونداي-اق قارا تەڭىز ەكونوميكالىق ىنتىماقتاستىق پارلامەنتتىك اسسامبلەياسى دەلەگاسيالارىنىڭ باسشىلارىمەن كەلىسسوزدەر جۇرگىزدى.
نۇرلان نىعماتۋلين تۇركى الەمىنىڭ رۋحاني استاناسى – تۇركىستان قالاسىندا تۇركپا-نىڭ مەرەيتويلىق ح پلەنارلىق سەسسياسىن وتكىزۋدىڭ ماڭىزدىلىعى مەن سيمۆولدىق ءمانىن اتاپ ءوتىپ، قالانىڭ قازىرگى جاندانۋى جانە جاڭارۋى قازاقستاننىڭ تۇڭعىش پرەزيدەنتى-ەلباسى، تۇركى كەڭەسىنىڭ قۇرمەتتى ءتوراعاسى نۇرسۇلتان نازاربايەۆتىڭ باستاماسى بويىنشا ءجۇرىپ جاتقانىن اتاپ ءوتتى.
ءماجىلىس سپيكەرى وتىرىستا قابىلدانعان شەشىمدەر پارلامەنتارالىق ءوزارا ءىس-قيمىلدى نىعايتۋعا، سونداي-اق ەلدەر اراسىنداعى جان-جاقتى ىنتىماقتاستىقتى دامىتۋعا ىقپال ەتەتىنىنە سەنىم ءبىلدىردى.
– بيىل قازاقستان مەن قىرعىزستان تاۋەلسىزدىگىنىڭ 30 جىلدىعى اتاپ وتىلەدى. وسى ۋاقىت ىشىندە ەلدەرىمىز ايتارلىقتاي جەتىستىكتەرگە جەتتى. ءبىزدىڭ مەملەكەتتەر باسشىلارىنىڭ ماڭىزدى باستامالارىن قولداۋ ءۇشىن قازاقستان مەن قىرعىزستان اراسىنداعى ءداستۇرلى دوستىق جانە تاتۋ كورشىلىك قاتىناستار، ونىڭ ىشىندە پارلامەنتارالىق دەڭگەيدە دە ودان ءارى دامي بەرەتىنىنە سەنىمدىمىن، – دەدى نۇرلان نىعماتۋلين قىرعىز رەسپۋبليكاسى جوگوركۋ كەنەشىنىڭ ءتوراعاسى تالانت مامىتوۆپەن كەزدەسۋدە.
حالىقارالىق پارلامەنتتىك ۇيىمدار شەڭبەرىندە پارلامەنتشىلەردىڭ ءوزارا ءىس-قيمىلىن نىعايتۋ ماسەلەلەرى تۇركپا-دا باقىلاۋشى مارتەبەسىنە يە ماجارستان مەن قارا تەڭىز ەكونوميكالىق ىنتىماقتاستىق پارلامەنتتىك اسسامبلەياسى دەلەگاسيالارىنىڭ باسشىلارىمەن تالقىلاندى.
– ءبىزدىڭ ەلدەرىمىزدىڭ باسشىلارى ۇنەمى كورسەتىپ وتىراتىن دامۋ جونىندەگى ورتاق كوزقاراستاردى قازاقستان مەن ماجارستان پارلامەنتشىلەرى دە ۇستانادى، – دەپ اتاپ ءوتتى نۇرلان نىعماتۋلين ماجارستان مەملەكەتتىك جينالىسىنىڭ ءبىرىنشى ۆيسە-سپيكەرى مارتا ماترايمەن كەزدەسۋدە.
مودەلدىك زاڭ شىعارۋ بازاسىن قالىپتاستىرۋ، پارلامەنتتىك ديپلوماتيانى نىعايتۋ تەتىكتەرىنە دەگەن قىزىعۋشىلىق قارا تەڭىز ەكونوميكالىق ىنتىماقتاستىق پارلامەنتتىك اسسامبلەياسى باس حاتشىسى اساف گادجييەۆپەن كەلىسسوزدەر بارىسىندا اتاپ ءوتىلدى.
ءماجىلىستىڭ باسپا ءسوز قىزمەتى
پىكىر قالدىرۋ