جامبىل وبلىسىندا اسكەري قويماداعى جارىلىستان قازا تاپقان ازاماتتار مەن ولاردىڭ ايەلدەرىنىڭ بانك الدىنداعى قارىزى كەشىرىلدى. بۇل تۋرالى وبلىس اكىمى بەردىبەك ساپاربايەۆ وڭىرلىك كوممۋنيكاسيالار قىزمەتىنىڭ باسپا ءسوز الاڭىندا ايتتى.
قارجى نارىعىن رەتتەۋ جانە دامىتۋ اگەنتتىگى جامبىل وبلىسىنىڭ اكىمدىگىمەن، بانكتەرمەن جانە وزگە دە قارجىلىق ۇيىمدارمەن بىرلەسىپ، بايزاق اۋدانىنداعى جارىلىستان قازا تاپقان ازاماتتاردىڭ وتباسىلارىنىڭ بورىشتىق جۇكتەمەسىن ازايتۋ جونىندە شارالار قابىلداعان.
– بانكتەرمەن، ميكروقارجى ۇيىمدارىمەن جانە كوللەكتورلىق اگەنتتىكتەرمەن جۇرگىزىلگەن جۇمىستارىمىز ناتيجەسىز اياقتالعان جوق. توتەنشە وقيعا سالدارىنان قايتىس بولعان قارىز الۋشىلار مەن ولاردىڭ ارتىندا قالعان جەسىرلەرىنىڭ بەرەشەكتەرىن تولىق كولەمدە ەسەپتەن شىعارۋ جونىندە ءبىرىڭعاي شەشىم شىقتى. بۇگىنگى تاڭدا 47 نەسيە بويىنشا بەرەشەك تولىعىمەن وتەلدى، – دەدى وبلىس اكىمى.
ەسكە سالا كەتەيىك، 26 تامىز كۇنى بايزاق اۋدانىندا ورنالاسقان 28349 اسكەري ءبولىمى اۋماعىندا بولعان ءورت پەن جارىلىس كەزىندە 17 ازامات كوز جۇمعان. 1 ادام حابار-وشارسىز كەتكەن. قازا بولعانداردىڭ اراسىندا توتەنشە جاعدايلار دەپارتامەنتىنىڭ، پروكۋراتۋرانىڭ قىزمەتكەرلەرى مەن اسكەري قىزمەتشىلەر بار.
پىكىر قالدىرۋ