ارون اتابەك 15 جىلدان بەرى تۇرمەدە وتىر. ول 2006 جىلعى "شاڭىراق" وقيعاسىنان كەيىن 18 جىلعا سوتتالعان. سوت اتابەكتى "شاڭىراق" وقيعاسى كەزىندە قازا تاپقان پوليسيا قىزمەتكەرىنىڭ ولىمىنە ايىپتى دەپ تانىعان.
قۇقىققورعاۋشى باقىتجان تورەعوجينا تۇرمەدەگى اقىن، بەلسەندى، ديسسيدەنت ارون اتابەك بوستاندىققا شىعاتىنىن ءمالىم ەتتى.
قۇقىققورعاۋشى پاۆلودار قالاسى №2 سوتى ارون اتابەكتىڭ دەنساۋلىق جاعدايىن ەسكەرىپ جازاسىنىڭ قالعان مەرزىمىن 1 جىلعا پروباسيالىق باقىلاۋعا الماستىرعانىن ايتادى.
سوت حابارلاماسىندا ارون اتابەك ومىرتقانىڭ مويىن بولىگى ومىرتقاارالىق ديسكىسىنىڭ ميەلوپاتياسىمەن زاقىمدالۋى، جۇلىننىڭ مويىن ءبولىمى دەڭگەيىندەگى دەگەنەراتيۆتى - دەميەلينيزيرلەۋشى اۋرۋى سەكىلدى ايىقپاس سىرقاتقا شالدىققانى جازىلعان.
وسىلايشا، سوت ارون اتابەكتىڭ جازانى وتەۋگە كەدەرگi جاسايتىن اۋىر ناۋقاستان زارداپ شەگەتىنىنە بايلانىستى قىلمىستىق كودەكستىڭ 77-بابى 2-بولىگىنە ساي، جازانى نەعۇرلىم جەڭiل جازا ءتۇرiمەن اۋىستىرۋ تۋرالى شەشىم شىعارعان.
"زاڭدا باياندالعان ءمان-جايلار مەن پروسەسسكە قاتىسۋشىلاردىڭ پىكىرىن ەسكەرىپ، سوتتالعان تۇلعاعا بوستاندىعىن شەكتەۋ جازاسى 1 جىل مەرزىمىنە پروباسيالىق باقىلاۋ ورناتۋ مەن مىندەتتەردى جۇكتەۋىنە اۋىستىرىلدى" دەلىنگەن سوت حابارلاماسىندا.
باقىتجان تورەعوجينا بىرەر كۇن بۇرىن عانا ارون اتابەك اۋرۋحاناعا جاتقىزىلعانى تۋرالى اقپارات العانىن حابارلاعان. وعان دەيىن بىرنەشە قۇقىققورعاۋشى ارون اتابەكتىڭ دەنساۋلىق جاعدايىن ەسكەرىپ، وعان راقىمشىلىق جاساۋ تۋرالى پرەزيدەنت قاسىم-جومارت توقايەۆقا حات جازىپ، قول جيناعان.
ال 18 تامىز كۇنى ازاپتاۋعا قارسى ۇلتتىق الدىن الۋ تەتىگى توبىنىڭ وكىلدەرى پاۆلودار وبلىسىنداعى اپ-162/1 تۇزەتۋ مەكەمەسىندە جازاسىن وتەپ جاتقان اقىنعا بارعانىندا ارون اتابەك توپ مۇشەلەرىنە دەنساۋلىعىنا بايلانىستى شاعىم ايتقان.
پىكىر قالدىرۋ