قازاقستان رەسپۋبليكاسىنىڭ «ادۆوكاتتىق قىزمەت جانە زاڭ كومەگى تۋرالى» زاڭىمەن جەكەلەگەن حالىق ساناتتارى زاڭگەرلىك كومەكتى تەگىن الۋعا قۇقىلى تۇلعالار رەتىندە بىلگىلەنگەن.

اقىسىز قۇقىقتىق قىزمەتتەر كەشەندى الەۋمەتتىك زاڭ كومەگى تۇرىندە نەمەسە مەملەكەت كەپىلدىك بەرگەن زاڭ كومەگى اياسىندا كورسەتىلۋى مۇمكىن.

كەشەندى الەۋمەتتىك زاڭ كومەگى ەرىكتى تۇردە وتەۋسىز زاڭ كومەگىن كورسەتۋ شارتىنا سايكەس:
- «ارناۋلى الەۋمەتتىك قىزمەتتەر تۋرالى» قازاقستان رەسپۋبليكاسىنىڭ زاڭىنا سايكەس ومىرلىك قيىن جاعدايدا جۇرگەن ادامدارعا؛
- اتاۋلى الەۋمەتتىك كومەككە قۇقىعى بار ادامدارعا؛
- ۇلى وتان سوعىسىنىڭ قاتىسۋشىلارىنا جانە جەڭىلدىكتەر بويىنشا ۇلى وتان سوعىسىنىڭ قاتىسۋشىلارىنا تەڭەستىرىلگەن ادامدارعا؛
- باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرىنە؛
- ءبىرىنشى جانە ەكىنشى توپتارداعى مۇگەدەكتەرگە؛
- جاسىنا بايلانىستى زەينەتكەرلەرگە؛
- قارتتار مەن مۇگەدەكتەرگە ارنالعان جالپى تيپتەگى مەديسينالىق-الەۋمەتتىك مەكەمەلەردە (ۇيىمداردا) تۇراتىن قارتتار مەن مۇگەدەكتەرگە كورسەتىلۋى مۇمكىن.

كەشەندى الەۋمەتتىك زاڭ كومەگى دەگەنىمىز – كليەنتتى زاڭ كومەگىن سۇراپ ءوتىنىش جاساعان كەزىنەن باستاپ قازاقستان رەسپۋبليكاسىنىڭ زاڭدارىندا كوزدەلگەن تارتىپپەن ءىس بويىنشا قورىتىندى قۇقىقتىق شەشىم قابىلدانعانعا (قۇقىقتىق جاعداي شەشىلگەنگە) دەيىن قۇقىقتىق قولداپ وتىرۋ.

كەشەندى الەۋمەتتىك زاڭ كومەگىن ادۆوكاتتار جانە ءتيىستى پالاتالاردىڭ مۇشەسى بولىپ تابىلاتىن زاڭ كەڭەسشىلەر ۇسىنا الادى.

ال، مەملەكەت كەپىلدىك بەرگەن زاڭ كومەگىن اكىمشىلىك جاۋاپتىلىققا تارتىلعان تۇلعاعا، كۇدىكتىگە، ايىپتالۋشىعا، سوتتالۋشىعا، سوتتالعان ادامعا، اقتالعان ادامعا، جابىرلەنۋشىگە قۇقىقتىق كونسۋلتاسيا بەرۋ، سونداي-اق سوتتاردا، قىلمىستىق قۋدالاۋ ورگاندارىندا، وزگە دە مەملەكەتتىك ورگاندار مەن مەملەكەتتىك ەمەس ۇيىمداردا جەكە تۇلعالاردىڭ مۇددەلەرىن قورعاۋ جانە ءبىلدىرۋ تۇرىندە قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن ادۆوكاتتار كورسەتەدى.

مەملەكەت كەپىلدىك بەرگەن زاڭ كومەگى اليمەنتتەر ءوندىرىپ الۋ، زەينەتاقى مەن جاردەماقىلار تاعايىنداۋ، اقتاۋ، بوسقىن نەمەسە قانداس مارتەبەسىن الۋ ماسەلەلەرى بويىنشا جەكە تۇلعالارعا، اتا-اناسىنىڭ قامقورلىعىنسىز قالعان كامەلەتكە تولماعاندارعا دا ادۆوكاتتار تاراپىنان كورسەتىلۋى مۇمكىن. ادۆوكاتتار قاجەت بولعان جاعدايلاردا قۇقىقتىق سيپاتتاعى جازباشا قۇجاتتار جاسايدى.

بۇل رەتتە، تۇلعالارعا مەملەكەت كەپىل بەرگەن زاڭ كومەگىن كورسەتكەن سوڭ، ادۆوكاتتار ءوز قىزمەتىنە اقىنى رەسپۋبليكالىق بيۋدجەتتەن الادى. اتاپ ايتقاندا، 2020 جىلى ازاماتتارعا اتالعان تارتىپپەن قۇقىقتىق كومەكتى كورسەتكەن شىمكەنت قالاسىنىڭ ادۆوكاتتارىنا 63 ملن.تەڭگە تولەنسە، 2021 جىلعا وسى ماقساتتارعا بيۋدجەتتەن 100 ملن.تەڭگە ءبولىندى.

ايتا كەتۋ كەرەك، كەلەسى جىلدارى مەملەكەتتەن وسى ماقساتتارعا بولىنەتى قارجى كولەمى ارتا تۇسەتىن بولادى.