الماتى وبلىسى بويىنشا سىبايلاس جەمقورلىققا قارسى قىزمەت قازاق ۇلتتىق قىزدار پەداگوگيكالىق ۋنيۆەرسيتەتىنىڭ مۇلكىن ۇرلادى دەگەن كۇدىكپەن ءبىرقاتار شەنەۋنىكتەردى ۇستاعانى حابارلاندى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ بۇرىنعى قىزمەتكەرى، "ازاماتتارعا ارنالعان ۇكىمەت" مەكەمەسى الماتى وبلىسى بويىنشا فيليالىنىڭ قاراساي اۋداندىق تىركەۋ جانە جەر كاداسترى ءبولىمىنىڭ جانە قاراساي اۋدانى اكىمدىگىنىڭ جەر قاتىناستارى ءبولىمىنىڭ باسشىلارى ۇستالعان. ولار 2018 جىلى كەمەرتوعان كەنتىندە ورنالاسقان اۋدانى 9 گەكتار جەر تەلىمى تۇرىندەگى ۋنيۆەرسيتەتتىڭ مۇلكىن ۇرلادى دەگەن كۇدىككە ىلىنگەن.
ۆەدومتسۆو مالىمەتىنشە، ۋنيۆەرسيتەتتىڭ جەر تەلىمى بىرنەشە تەلىمگە زاڭسىز بولىنگەن جانە جالعان قۇجاتتارمەن ۇستالعان تۇلعالارعا ۇلەستەس بولىپ راسىمدەلىپ، كەيىن باسقا ساتىپ الۋشىلارعا ساتىلعان.
"اتالعان تۇلعالار قىلمىس ىزدەرىن جاسىرۋ جانە جەر تەلىمىن ۋنيۆەرسيتەت بالانسىنا جالعان قايتارۋ ماقساتىندا 2021 جىلدىڭ قاڭتارىندا قۇقىق بەلگىلەيتىن قۇجاتتارسىز مەملەكەتتىڭ جەر قورىنان كولدى كەنتىندە سانيتارلىق ايماقتا ورنالاسقان جەكە مەنشىككە بەرۋگە جاتپايتىن جەر تەلىمىن زاڭسىز بولگەن" دەلىنگەن حابارلامادا.
قازىرگى ۋاقىتتا بارلىق كۇدىكتىلەرگە سوت سانكسياسىمەن بۇلتارتپاۋ شاراسى تاعايىندالعان.
جاسالعان قىلمىسقا قاتىسى بار باسقا ادامداردى انىقتاۋ ماقساتىندا قاجەتتى تەرگەۋ شارالارى جۇرگىزىلىپ جاتىر.
پىكىر قالدىرۋ