بۇگىندە ميلليوننان اسا تۇرعىنى بار مەگاپوليستە ساناق جۇرگىزۋ ءۇشىن 176 ساناق ۋچاسكەسى قۇرىلىپ، وندا 176 نۇسقاۋشى-باقىلاۋشى مەن 1207 ينتەرۆيۋەر 1 قازاننان باستاپ ءداستۇرلى تىركەۋگە كىرىسىپ كەتكەن-دى. ال 1 قىركۇيەكتەن 15 قازانعا دەيىن رەسپوندەنتتەر ونلاين تىركەلگەن بولاتىن.

ق ر ۇلتتىق ستاتيستيكا بيۋروسى باسپا ءسوز قىزمەتىنىڭ حابارلاۋىنشا، 15 قازاندا ساناقتىڭ ونلاين تىركەۋ كەزەڭى اياقتالعان سوڭ، ەلىمىزدىڭ بارلىق وڭىرلەرىنەن، اسىرەسە قالالاردان ونلاين ساناق فۋنكسياسىنىڭ مەرزىمىن ۇزارتۋ تۋرالى كوپتەگەن ءوتىنىش تۇسكەن. وسىعان بايلانىستى sanaq.gov.kz سايتىندا ونلاين ساۋالناما فۋنكسياسىن قايتا قوسۋ تۋرالى شەشىم قابىلدانعان. ياعني، ءسىز ساناق ساۋالدارىنا جاۋاپ بەرمەگەن بولساڭىز، ءالى دە ونلاين تىركەلە الاسىز. ساناق ساۋالدارىنا sanaq.gov.kz ارنايى سايتى، E-Gov پورتالى ارقىلى تىركەلىپ نەمەسە Aitu ءموبيلدى قوسىمشاسى ارقىلى جاۋاپ بەرۋگە بولادى. ياعني، ونلاين ءوتۋ مۇمكىندىگى حالىق ساناعى اياقتالعانعا دەيىن قولجەتىمدى بولماق.

قارلىعاش ءابىلقاسىموۆا – شىمكەنت قالالىق ءبىلىم باسقارماسىنا قاراستى №52 جالپى ورتا مەكتەپتىڭ ءمۇعالىمى. كاسىبي قىزمەتىنە قوسىمشا قوعامدىق جۇمىستا دا بەلسەندىلىك تانىتىپ، شىمكەنت قالاسى اباي اۋدانىنداعى №23 ساناق ۋچاسكەسىندە نۇسقاۋشى-باقىلاۋشى قىزمەتىن اتقارىپ ءجۇر.

– ءبىزدىڭ №23 ساناق ۋچاسكەسىنە تەلمان شاعىن اۋدانىنداعى 1943 تۇرعىن ءۇي بەكىتىلگەن. بۇگىنگە دەيىن ۋچاسكەدەگى 7 ينتەرۆيۋەر 726 ءۇيدى ارالاپ، 3873 رەسپوندەنتتى ءداستۇرلى تىركەدى. ال، ونلاين 102 ادام تىركەلگەن. ينتەرۆيۋەرلەر جەكە تۇرعىن ءۇي سەكتورلارىن ارالاعاندا ءتۇرلى كەلەڭسىزدىكتەرگە تاپ بولىپ جاتىر. اسىرەسە، الاياقتاردان قورقىپ قالعان تۇرعىندار اراسىندا ساناق ساۋالدارىنداعى جەكە سۇراقتارعا جاۋاپ بەرۋدەن باس تارتىپ، ەسىگىن جاۋىپ الاتىندارى دا بار. دەسەك تە، ءوزىمىزدىڭ قىزمەتىمىزدى راستايتىن كۋالىكتى كورسەتىپ، ءتۇسىندىرۋ جۇمىستارىن جۇرگىزۋ ارقىلى ساناق تىزىمىنە الىنىپ وتىر، – دەيدى قارلىعاش پەرنەحان قىزى.

ساناق ماماندارىنىڭ ايتۋىنشا، ءداستۇرلى تىركەۋ جۇمىس كۇندەرىندە قولايسىزدىق تۋدىرادى ەكەن. تۇرعىنداردىڭ ءبىرقاتارى جۇمىستا بولسا، ەندى ۇيىنە كەش ورالىپ جاتادى.

– سەنبى، جەكسەنبى كۇندەرى ءداستۇرلى تىركەۋ جۇمىسى ونىمدىرەك. سەبەبى، رەسپوندەنتتەردى دەمالىس كۇندەرى ۇيىنەن تابۋ وڭاي. سونداي-اق، ەسىگى جابىق جەكە سەكتورلار تۇرعىندارىن تابۋدا كورشىلەردىڭ دە كومەگى كوپ تيۋدە، – دەيدى ق.ءابىلقاسىموۆا.

ايتا كەتەيىك، ساناق 30 قازانعا دەيىن جالعاسادى. ال، ماماندار ساناقتىڭ سوڭعى ونكۇندىگىندە قالا تۇرعىندارىن بەلسەندىلىك تانىتۋعا شاقىرادى.

زاميرا الدابەرگەنوۆا
شىمكەنت كەلبەتى