پرەزيدەنت قاسىم-جومارت توقايەۆ ەلىمىزدە 2025 جىلعا دەيىن 2 ملرد اعاش وتىرعىزۋ جوباسىن جۇزەگە اسىرۋ بويىنشا تاپسىرمالار بەرگەن بولاتىن. وسى ورايدا ەل تاۋەلسىزدىگىنىڭ 30 جىلدىق مەرەيتويى اياسىندا 30 مىڭ اعاش وتىرعىزۋ باستاماسىن قولعا العان قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلىنىڭ ىزگى شاراسى جالعاسىمەن الماتى قالاسى الاتاۋ اۋدانىندا اعاش وتىرعىزىلدى.

ساۋاپتى امالعا قمدب نايب ءمۇفتيى كەنجەالى قاجى مىرزابايەۆ، الماتى قالاسىنىڭ باس يمامى تولەبي ءدادىل ۇلى، ءدىن قىزمەتكەرلەرى مەن ۇستاز-شاكىرتتەر قاتىستى. «ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە-كىم ءبىر تال ەكسە، ول جەمىس بەرگەنشە اللا تاعالا مىندەتتى تۇردە وعان ساۋاپ جازادى» دەگەن. پايعامبار ءحاديسى مەن سۇننەتتەرى جولىندا ءماۋلىت ايىنداعى ىزگىلىك شاراسىنا اۋدان تۇرعىندارى دا اتسالىستى.

تاعى ءبىر حاديستە: «كىمدە-كىم ءبىر تال ەگىپ، ونىڭ جەمىسىنەن ادام نەمەسە اللا تاعالانىڭ جاراتىلىستارىنان بىرەۋ جەسە، اقيقاتىندا ول ادام ءۇشىن بۇل ءبىر ساداقا» دەلىنگەن. «ءبىز جاماعاتتى قورشاعان ورتانى قورعاپ، اعاش وتىرعىزۋعا ۇندەپ كەلەمىز. قالا كوركىنىڭ اجارلانىپ، تۇرعىندارعا قولايلى جاعداي جاسالۋى ماڭىزدى ءىس. وسىعان دەيىن الماتى وكىلدىگى 850ء-تۇپ اعاش وتىرعىزدى. بۇل باعىتتاعى جۇمىستارىمىزدى جالعاستىرا بەرەمىز» دەپ اتاپ ءوتتى باس يمام وسپان تولەبي ءدادىل ۇلى. 

حالىق دانالىعىندا: «ادامگەرشىلىككە ارنالعان ءۇش ساۋاپ:

شولگە قۇدىق قازعان ءبىر ساۋاپ،

وزەنگە كوپىر سالعان ءبىر ساۋاپ

جولعا اعاش ەككەن ءبىر ساۋاپ» دەگەن ءسوز بار. ماعىنالى ءسوزدى مايەك ەتكەن ءدىن قىزمەتكەرلەرىنىڭ ءىسىن كوپشىلىك جاماعات تا قولدادى.