قالانىڭ اۋىلشارۋاشىلىعى سالاسىندا جالپى ءونىمنىڭ ناقتى كولەم يندەكسى بيىلعى جىلدىڭ توعىز ايىندا 101،6%-عا ورىندالىپ، 34،1 ملرد. تەڭگەگە جەتكەن. ءونىم ەكسپورتىنىڭ كولەمى 103،2%-عا، ەڭبەك ونىمدىلىگى – 107،5%-عا ارتىپ، نەگىزگى كاپيتالعا باعىتتالعان ينۆەستيسيا 4،2 ملرد. تەڭگەگە جەتكەن. بۇل تۋرالى قالا اكىمى مۇرات ايتەنوۆكە بەرگەن ەسەبىندە قالالىق اۋىل شارۋاشىلىعى باسقارماسىنىڭ باسشىسى ا.قانىبەكوۆ باياندادى.
ەگىستىك القابى 29 مىڭ گەكتاردان اسىپ، جىلىجاي كولەمى 204 گەكتارعا جەتكەن. بيىلعى جىلى 2،6 ملرد تەڭگەگە 2 جىلىجاي كەشەندەرى ىسكە قوسىلدى.
اۋىل شارۋاشىلىعى سالاسىندا 7،6 ملرد. تەڭگە بولاتىن 17 ينۆەستيسيالىق جوبا ىسكە اسىرىلىپ، 248 جۇمىس ورىندارى اشىلعان. ونىڭ ىشىندە 9 جىلىجاي كەشەندەرى، 3 تاۋارلى ءسۇت فەرماسى، 7 مال بورداقىلاۋ الاڭى، 2 بالىق شاۋاشىلىعى، 2 اۋىل شاۋرۋاشىلىعى ونىمدەرىن وڭدەۋ كاسىپورنى ىسكە قوسىلعان، ءبىر قۇس شارۋاشىلىعىنىڭ وندىرىستىك قۋاتى ارتقان.
بەكىتىلگەن جوسپارعا سايكەس، جالپى قۇنى 16،3 ملرد. تەڭگەنى قۇرايتىن 28 ينۆەستيسيالىق جوبانى ىسكە اسىرۋ كوزدەلگەن. ناتيجەسىندە قوسىمشا 1،5 مىڭ ادام تۇراقتى جۇمىسپەن قامتىلاتىن بولادى.
ازىق-تۇلىك ونىمدەرىنە باعا تۇراقتىلىعىن ساقتاۋ باعىتىندا زاماناۋي ۇلگىدەگى 6 قويماعا قوسىمشا 4 جاڭا قويما اشىلىپ، قالا بويىنشا بارلىعى 10 قويما كوتەرمە-تاراتۋ ورتالىقتارى مىندەتىن اتقارادى. ناتيجەسىندە وندىرىلگەن ونىمدەر دەلدالدىق قىزمەتتىڭ قاتىسۋىنسىز ساۋدا ورتالىقتارىنا جەتكىزىلەدى. بۇل باعىتتا ونلاين ساۋدا جەلىسىن جولعا قويۋ كوزدەلگەن.
باسقارما تاراپىنان ءۇي ىرگەلىك جەرلەردى ءتيىمدى يگەرۋ، كووپەراسيالاردى دامىتۋ باستامالارى قولعا الىنباق. بۇل جوبالار حالىقتى جۇمىسپەن قامتۋعا، تۇرعىندار تابىسىن ارتىرۋعا سەرپىن بەرەدى.
اۋىل شارۋاشىلىعى سالاسىنداعى جۇمىستىڭ تاعى ءبىر تىڭ باعىتى – بۇل جاڭا تەحنولوگيالارعا نەگىزدەلگەن مال ازىعى ءوندىرىسىن اشۋ. بۇل باعىتتا ءبىر جىلدا 4 مارتە ءونىم الۋعا مۇمكىندىك بەرەتىن گيدروپونيكا ءادىسىن كەڭىنەن ەنگىزۋ مۇمكىندىكتەرى قاراستىرىلۋدا.
جيىندى قورىتىندىلاعان قالا باسشىسى اۋىل شارۋاشىلىعى سالاسى ازىق-تۇلىك قاۋىپسىزدىگىنە جاۋاپ بەرەتىن قۇرىلىم ەكەنىن ايتتى. اۋىل شارۋاشىلىق ونىمدەرىن وڭدەۋدىڭ ماڭىزدىلىعىنا توقتالىپ، ازىق-تۇلىك ءوندىرىسىن دامىتۋ بويىنشا ءبىرقاتار تاپسىرمالار بەردى.
پىكىر قالدىرۋ