Facebook ءوزىنىڭ كورپوراتيۆتىك اتاۋىن "Meta" دەپ وزگەرتتى. وزگەرىستەر كورپوراسيانىڭ Facebook، Instagram جانە Whatsapp سياقتى جەكە پلاتفورمالارىنا قاتىستى ەمەس، تەك ولارعا يەلىك ەتەتىن باس كومپانياعا عانا قاتىستى.
مەتاۆەرس جانە ۆيرتۋالدى شىندىق (ۆش)
"Meta" ءسوزى گرەكتىڭ "ارعى" دەگەن سوزىنەن شىققان.
كومپانيا ۆيرتۋالدى شىندىق سياقتى سالالار تۋرالى جوسپارىن جاريالادى.
Facebook باسشىسى مارك سۋكەربەرگ "مەتاۆەرس" دەگەن جاڭا اتاۋدى قولدانىپ، ادامدار ۆيرتۋالدى ورتادا ويىن ويناي الاتىن، جۇمىس ىستەي الاتىن جانە سويلەسە الاتىن ۆيرتۋالدى ونلاين الەمدى قۇرۋ جوسپارىن جاريالادى.
اۋتسايدەرلەر ءۇشىن مەتاۆەرس ۆيرتۋالدى شىندىق نۇسقاسى سياقتى كورىنۋى مۇمكىن، ءبىراق كەيبىر ادامدار "بۇل ينتەرنەتتىڭ بولاشاعى بولۋى مۇمكىن" دەپ سانايدى.
كومپيۋتەرمەن سالىستىرعاندا، مەتاۆەرستەگى ادامدار ۆيرتۋالدى الەمگە كىرۋ ءۇشىن گارنيتۋرانى پايدالانادى.
سۋكەربەرگ قازىرگى برەند "بولاشاق بىلاي تۇرسىن، بۇگىن جاساپ جاتقانىمىزدىڭ بارلىعىن كورسەتە المايدى" دەدى جانە ونى وزگەرتۋ كەرەكتىگىن مالىمدەدى.
"ۋاقىت وتە كەلە، ءبىز مەتاۆەرستى كومپانيا رەتىندە قالىپتاسامىز دەپ ۇمىتتەنەمىن. ءقازىر ءبىز بيزنەسىمىزدى ەكى ءتۇرلى سەگمەنت رەتىندە قاراستىرىپ، ەسەپ بەرىپ جاتىرمىز، ءبىرى قولدانىلمالى جۇمىسقا ارنالعان، ەكىنشىسى بولاشاق پلاتفورمالارداعى جۇمىسىمىز ءۇشىن. سونىمەن قاتار وسىنىڭ ءبىر بولىگى رەتىندە ءبىز جاسايتىن بارلىق نارسەنى قامتيتىن، ءوزىمىزدىڭ كىم ەكەنىمىزدى جانە نەنى قۇرۋعا ۇمىتتەنەتىنىمىزدى كورسەتەتىن جاڭا كومپانيا برەندىن قابىلداۋدىڭ ۋاقىتى كەلدى" دەدى سۋكەربەرگ.
سونداي-اق كومپانيا كاليفورنيا شتاتى مەنلو پارك شتاب-پاتەرىندەگى باس بارماق جوعارى كوتەرىلگەن "ۇناتۋ" لوگوتيپىن كوك شەكسىزدىك پىشىنىنە اۋىستىرعان جاڭا بەلگىنى اشتى.
اقپاراتقا سايكەس، ۆيرتۋالدى الەم بارلىق سالالاردا قولدانىلۋى ىقتيمال. جۇمىس، ويىن، كونسەرتتەر، دوستارمەن جانە وتباسىمەن ارالاسۋعا دەيىن، ءىس جۇزىندە كەز كەلگەن نارسە ءۇشىن ۆەرتۋالدى شىندىق پايدالانۋعا بولادى.
Facebook 1 جەلتوقساننان باستاپ "MVRS" دەپ اتالاتىن جاڭا اكسيا كودى بويىنشا ءوز اكسيالارىن ساتۋدى باستاۋعا نيەتتى ەكەنىن دە مالىمدەدى.
جاريالانعان "ىشكى قۇجاتتار" تۋرالى داۋ
بۇعان دەيىن كومپانيانىڭ بەدەلىنە نۇقسان كەلەتىن اقپاراتتار جاريالانعان. "The Washington Post" گازەتى Facebook پاندەميا كەزىندە ساياساتكەرلەردەن ماڭىزدى اقپارات جاسىرعانىن حابارلادى. گازەتتىڭ اقپاراتىنشا، كومپانيا ۆاكسينا تۋرالى جالعان اقپاراتتاردى جاسىرعان.
Facebook-تىڭ بۇرىنعى قىزمەتكەرى فرەنسيس حاۋگەن كومپانيانىڭ ىشكى قۇجاتتارىن جاريالاپ، Facebook-كە قاتىستى جاعىمسىز وقيعالاردى مالىمدەگەن.
حاۋگەن "كومپانيا پايدانى قاۋىپسىزدىكتەن جوعارى قويادى" دەپ جاريالادى. بۇل – ونىڭ باق-قا تاراتقان "ىشكى قۇجاتتار تۋرالى وقيعالار سەرياسىنىڭ" سوڭعىسى بولدى.
اقپاراتقا سايكەس، جاسوسپىرىمدەردىڭ پسيحيكالىق دەنساۋلىعىنا Instagram-نىڭ زيان كەلتىرەتىنى تۋرالى زەرتتەۋلەر بولعان جانە Facebook اقش-تان تىس پلاتفورمالارىنان وشپەندىلىك سوزدەرىن جويۋعا تىرىسىپ، زەرتتەۋلەر جاساعان.
ساراپشىلار نە دەيدى؟
ساراپشىلار سۋكەربەرگتىڭ بۇل قادامى نازاردى Facebook-تىڭ اينالاسىنداعى جاعىمسىز وقيعالاردان باسقا جاققا اۋدارۋ ەكەنىن ايتادى.
سىنشىلار "Facebook برەندىنىڭ جاعىمسىز ءيميدجى قالىپتاسىپ بارا جاتقان سوڭ، وسىلاي جاسالدى" دەپ سانايدى. كەيبىرەۋلەر بۇل قادامدى "كوسمەتيكالىق وزگەرىس" دەپ سيپاتتادى.
كەيبىر ساراپشىلار "مەتاۆەرس ءالى جوق. سۋكەربەرگ ونىڭ ۇزاق مەرزىمدى ءونىم ەكەنىن باسا ايتتى. سوندىقتان ءسىزدىڭ نەگىزگى ۇسىنىسىڭىزعا مۇلدەم قاتىسى جوق اتاۋ بولۋى مۇمكىن. Facebook تابىسىنىڭ بارلىعى دەرلىك Facebook پەن Instagram جارناماسىنان تۇسەدى" دەيدى.
ايتا كەتەيىك، بۇعان دەيىن دە باسقا عالامدىق تەح-كومپانيالار اتىن وزگەرتكەنىن جاريالاعان. دەگەنمەن، كورنەكتى وزگەرىس بولمادى. مىسالى، Google اتاۋىن 2015 جىلى "Alphabet"-كە وزگەرتتى. الايدا، Google-دىڭ اتىن ەشكىم دە "Alphabet" دەپ اتامايدى.
پىكىر قالدىرۋ