شىمكەنت قالاسىنا «ەلىم ءۇشىن ەگىلەمىن» اتتى ازاماتتىق شتابتىڭ وكىلدەرى كەلدى. اتاپ ايتقاندا، قازاقستان زاڭگەرلەر وداعىنىڭ نۇر-سۇلتان قالاسىنداعى فيليالىنىڭ ءتوراعاسى، ازاماتتىق شتاب مۇشەسى سەرىك بەركامالوۆ پەن سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ قالاداعى وقۋشىلار سارايىندا مەكتەپ ديرەكتورلارى جانە مۇعالىمدەرمەن كەزدەستى.

ايتا كەتەيىك، بۇل شتاب بيىلعى تامىز ايىندا قۇرىلعان. ازاماتتىق شتابتىڭ ماقساتى – حالىققا ۆاكسينا قابىلداۋ شاراسىنىڭ ءمان-ماڭىزىن ءتۇسىندىرىپ، ەلدى ەكپە تۋرالى جالعان اقپاراتتاردان اۋلاق بولىپ، رەسمي اقپاراتقا عانا سەنىپ، ماسەلەنىڭ اق-قاراسىن اجىراتا بىلۋگە ۇندەۋ.

بۇكىل ەلىمىزدىڭ پاندەمياعا دەيىنگى قالىپتى ومىرگە ورالۋىنىڭ جالعىز جولى ۆاكسيناسيالاۋ. بۇگىندە شىمكەنتتە ازاماتتاردىڭ باسىم بولىگى ەكپە قابىلداپ ۇلگەردى. الايدا الدىمىزدا ريەۆاكسيناسيا ناۋقانى تۇر. ەكپە قابىلداعانىنا 9 اي تولعان ازاماتتار ەندىگى جەردە يناكتيۆتەلگەن ۆاكسينانى قابىلداۋى ءتيىس. وعان قوسا بۇگىندە ەل ۇكىمەتى Pfizer ۆاكسيناسىن وندىرۋشىلەرمەن كەلىسسوز جۇرگىزىپ جاتىر. الداعى ۋاقىتتا ەلىمىزگە ەكپەنىڭ وسى ءتۇرى كەلسە، جۇكتى ايەلدەر مەن وقۋشىلار ۆاكسينالانۋى مۇمكىن، – دەدى ە.بايتانايەۆ.

ونىڭ ايتۋىنشا، ەكپە 12-17 جاس ارالىعىنداعى بالالارعا اتا-اناسىنىڭ كەلىسىمىمەن عانا سالىنادى. اتا-اناسى ەكپەدەن باس تارتقان جاعدايدا وقۋشىنى ەشكىم ماجبۇرلەپ ۆاكسينالامايدى. ەكپە سالعىزباعان وقۋشىلار ساباقتان شەتتەتىلمەيدى.

قالا بەردى ۆاكسيناسيالاۋ مەكتەپ قابىرعاسىندا جۇرگىزىلمەيدى. بۇل ۆاكسينانى بالاسىنا سالعىزعىسى كەلگەن اتا-انالار ارنايى بەكىتىلگەن ەمحاناعا بالاسىن ەرتىپ بارۋى ءتيىس. ەكپە سول جەردە اتا-انانىڭ جانە دارىگەردىڭ باقىلاۋىمەن عانا سالىنادى. سوندىقتان، «بالاما مەكتەپتە مەنىم كەلىسىمىمسىز ۆاكسينا سالىپ جىبەرمەي مە» دەپ قورقۋدىڭ قاجەتى جوق، – دەدى شتاب وكىلى.

سونداي-اق، ول الەۋمەتتىك جەلىلەردە «12 جاسقا تولماعان بالالار دا ۆاكسيناسيالانادى» دەگەن اقپارات تاراعانىن، ءبىراق، مۇنىڭ شىندىققا جاناسپايتىنىن دا اتاپ ءوتتى.