شىمكەنتتە قۇتقارۋشىلار كۇنىنە وراي ءورت سوندىرۋشىلەر اراسىندا كوپسايىستىق كۇشسىناسۋ، ياعني كروسسفيتتەن سايىس ۇيىمداستىرىلدى.

كروسسفيت - بۇل كۇش پەن توزىمدىلىككە ارنالعان جاتتىعۋلار باعدارلاماسى. ال ءورت سوندىرۋشىلەر مەن قۇتقارۋشىلار مۇنداي جاتتىعۋلاردى كۇندەلىكتى جاسايدى. ويتكەنى ولاردىڭ قىزمەتى شىدامدىلىقتى، قايسارلىقتى تالاپ ەتەتىن ءىس-قيمىلداردان تۇرادى.

قۇتقارۋشىلاردىڭ دايىندىعىن تەكسەرۋگە باعىتتالعان سايىسقا ءار ءورت ءسوندىرۋ بولىمىنەن 2 ءورت سوندىرۋشىدەن قاتىستى. گىر تاسىن جانە ءزىل تەمىردى كوتەرۋ، دوڭعالاقتاردى كوتەرۋ، جىلجىتۋ، تۇتىكقۇبىرلارمەن جاۋىنگەرلىك قانات جويۋ، وقۋ-جاتتىعۋ مۇناراسىنىڭ 3-قاباتىنا جىلجىمالى ءۇش ءيىندى ساتىمەن كوتەرىلۋ، 3-قاباتتان قۇتقارۋ ارقانىمەن ءوزىن-وزى قۇتقارۋ، جايىلعان تۇتىكقۇبىردى سەگىزدىك ادىسىمەن جيناۋ بويىنشا كۇش سىناستى.

كۇندەلىكتى توتەنشە جاعدايلاردى جويۋ كەزىندە سالماعى اۋىر جاۋىنگەرلىك كيىمنەن بولەك ءتۇرلى قۇرالداردى بىرگە الا ءجۇرىپ، دەمالۋعا مۇمكىن بولماعان ورتادا قىسىمدالعان اۋانى ءتيىمدى پايدالانا وتىرىپ، ادام ءومىرىن قۇتقارۋدى، ءورتتى ءسوندىرۋدى جۇزەگە اسىراتىن ماماندىق يەلەرى ءۇشىن مۇنداي دايىندىق كۇنتىزبەدەن تۇسكەن ەمەس.