شىمكەنت قالاسى بويىنشا «نۇرلى جەر» باعدارلاماسى اياسىندا 500 ملن. تەڭگەگە تۇرعىن ءۇي سەرتيفيكاتىن بەرۋ جالعاسادى. 2021 جىلدىڭ 1 قازانىنان باستاپ باستاپ تولەم قابىلەتىن راستاعان جانە بانكتىڭ يپوتەكالىق قارىز شارتىن ماقۇلداۋ تۋرالى حاتىن العان ازاماتتاردان ءوتىنىش پەن قۇجاتتار قابىلداۋ جۇمىستارى جۇرگىزىلەدى.

تۇرعىن ءۇي سەرتيفيكاتتارىن مۇگەدەك بالالارى بار نەمەسە مۇگەدەك بالالاردى تاربيەلەپ وتىرعان، كوپبالالى، تولىق ەمەس وتباسىلار الا الادى. سونداي-اق، مەملەكەتتىك مەكەمەلەرى مەن مەملەكەتتىك كاسىپورىندارىنىڭ، دەنساۋلىق ساقتاۋ، ءبىلىم بەرۋ، مادەنيەت، سپورت سالاسىنىڭ ماماندارى، قۇقىق قورعاۋ ورگاندارىنىڭ قىزمەتكەرلەرى جانە مەملەكەتتىك قىزمەتشىلەر دە بۇل جەڭىلدىكتەن ءۇمىتتى.

تۇرعىن ءۇي سەرتيفيكاتى «نۇرلى جەر» مەملەكەتتىك باعدارلاماسى اياسىندا 1 ميلليون تەڭگەگە دەيىن مولشەردە مەملەكەت تاراپىنان باستاپقى جارنا مولشەرىنىڭ ءبىر بولىگىن جابۋ ءۇشىن ۇسىنىلادى. قاتىسۋعا نيەت بىلدىرگەن تۇلعا سوڭعى 6 ايدا وتباسىنىڭ جيىنتىق تابىسى ونىڭ ءاربىر مۇشەسىنە شاققاندا 106336،2 تەڭگەدەن اسپاعان جاعدايدا جانە تۇرعىن ءۇي ساتىپ الۋعا يپوتەكالىق تۇرعىن ءۇي قارىزىن بەرۋ تۋرالى بانكتىڭ ماقۇلداعان حاتى ارقىلى تۇرعىن ءۇي سەرتيفيكاتىنا ءوتىنىم جىبەرە الادى.

تۇرعىن ءۇي سەرتيفيكاتىنا وتىنىمدەر «كezekte.kz» ينتەرنەت رەسۋرسى ارقىلى ونلاين قابىلدانادى. بۇل ءۇشىن ءاربىر ازاماتتىڭ جانە ونىڭ كامەلەتكە تولعان وتباسى مۇشەلەرىنىڭ ەلەكتروندى سيفرلىق قولتاڭباسى (ەسق) بولۋى قاجەت. ايتا كەتۋ كەرەك، بۇگىندە 132 ازامات تۇرعىن ءۇي سەرتيفيكاتىنىڭ يەگەرى اتانىپ، مەملەكەتتىك كومەككە يە بولعان.