يگى ءىس جاساپ جارىساتىن تۇلعالار اراسىندا «قايىرىمدىلىق كەرۋەنى» بايقاۋىنا ىرىكتەۋ باستالدى. اتالعان سايىس بيىل رەسپۋبليكا كولەمىندە 4ء-شى رەت وتكىزىلەدى. بۇل تۋرالى، ارنايى وتكەن بريفينگتە قالالىق ىسكەر ايەلدەر قاۋىمداستىعى ءتورايىمى ەلميرا سوزاقبايەۆا ايتتى.
«قايىرىمدىلىق كەرۋەنى» بايقاۋى ىزگى ءىس جاساۋعا اسىققان ازاماتتار اراسىندا جىل سايىن وتكىزىلەدى. مەيىرىمگە تولى ءىس-شارانىڭ نەگىزگى ماقساتى – الەۋمەتتىك كومەككە ءزارۋ جاندارعا كومەك قولىن سوزۋ. جومارت جانداردىڭ ءىسىن بۇقاراعا ناسيحاتتاۋ.
ەلميرا سوزاقبايەۆا، شىمكەنت قالاسى بويىنشا ىسكەر ايەلدەر قاۋىمداستىعىنىڭ ءتورايىمى
- بايقاۋ جىل سايىن قازاقستان دامۋىنا قوماقتى ۇلەس قوسقان باتىل، قامقور جانداردى، مەسەناتتار مەن ناعىز پاتريوتتاردى انىقتايدى. بايقاۋدى ن.نازاربايەۆ قورى، قازاقستاننىڭ ىسكەر ايەلدەر قاۋىمداستىعى، «وقجەتپەس» ەمدەۋ-ساۋىقتىرۋ كەشەنى، «حابار» اگەنتتىگى، «كتك» تەلەارناسى جۇزەگە اسىرادى.
قاتىسۋشىلار 7 نوميناسيا بويىنشا سايىسقا تۇسەدى. اتالعان نوميناسيالار قوعامداعى تۇيتكىلدى ماسەلەلەردى شەشۋگە ات سالىسقان ازاماتتارعا بەرىلەدى. جەڭىمپازدارعا «وقجەتپەس» ەمدەۋ-ساۋىقتىرۋ كەشەنىنە جولداما بەرىلەدى.
اسەم ادىلبەكوۆا، شىمكەنت قالاسى بويىنشا ىسكەر ايەلدەر قاۋىمداستىعى ءتورايىمىنىڭ ورىنباسارى «اسار» نوميناسياسى حالىقتىق ءسالت-داستۇردى ساقتاۋعا باعىتتالعان قايىرىمدىلىق قىزمەتتى اتقاراتىن جاندارعا تابىستالادى. «تۋعان جەر» نوميناسياسى ءبىلىم بەرۋ، ەكولوگيا جانە ابباتتاندىرۋ، مادەني نىسانداردى قالپىنا كەلتىرۋ سالالاردا تۋعان ولكەسىنە قايىرىمدىلىق كورسەتكەن لاۋرەاتقا تابىستالادى. «باتىل جۇرەك» نوميناسياسى ەرلىك پەن قايسارلىق تانىتقان ادامدارعا بەرىلەدى. بۇل نوميناسيا شەڭبەرىندە شۇعىل قىزمەت – تج، ءىىم، جەدەل جاردەم قىزمەتكەرلەرىنىڭ اراسىندا ەڭ ۇزدىكتەرگە قوسىمشا جەڭىمپاز اتاعى بەرىلۋى مۇمكىن.
ۇيىمداستىرۋشىلاردىڭ سوزىنشە «مەيىرىم جولىندا» نوميناسياسىمەن قايىرىمدىلىقپەن تۇراقتى تۇردە اينالىساتىن ازاماتتار ماراپاتتالادى. «قايىرىمدىلىق تاريحى» قوعامداعى وزەكتى ماسەلەلەردى جاريالاعان جۋرناليست نەمەسە شىعارماشىلىق توپقا بەرىلەدى. ال «بالا جۇرەگى» نوميناسياسى توتەنشە جاعدايدا ەرلىك كورسەتكەن جاسوسپىرىمدەرگە تابىستالادى.
قايىرىمدى جاندار اراسىنداعى بايقاۋعا ءوتىنىم بەرۋ 30-قاراشاعا دەيىن جالعاسادى. ال ىرىكتەۋ جەلتوقساننىڭ 1 مەن 31 ارالىعىندا وتەدى. ءداستۇر بويىنشا ۇزدىكتەردى ماراپاتتاۋ ءراسىمى 26 اقپانعا جوسپارلانۋدا.
پىكىر قالدىرۋ