شىمكەنت قالاسىندا جىل سوڭىنا دەيىن زەينەتكەرلەرگە ارنالعان بەلسەندى ءومىر ءسۇرۋ ورتالىقتارى اشىلادى. قارت ادامداردىڭ دەنساۋلىعىن قولداۋ جانە بوس ۋاقىتىن ءتيىمدى وتكىزۋدى ۇيىمداستىرۋ مەكەمەلەرى مەگاپوليستىڭ 4 اۋدانىندا جۇمىس ىستەيتىن بولادى. بۇل جۇمىستار قارتتاردى قولداۋعا ارنالعان 2025 جىلعا دەيىنگى جوسپار اياسىندا جۇزەگە اسىرىلماق.
بۇگىن قالا اكىمىنىڭ ورىنباسارى ەرعالي بىلىسبەكوۆ الداعى ۋاقىتتا اشىلاتىن زەينەتكەرلەر مەن كوپبالالى انالارعا الەۋمەتتىك قىزمەت تۇرلەرىن ۇسىناتىن ورتالىقتاردى تەكسەرىپ ءوتتى.
ەرعالي بىلىسبەكوۆ ءبىرىنشى كەزەكتە عيماراتتا تالاپقا ساي زاماناۋي ديزاين، پاندۋس، جەلدەتكىش، ليفت پەن كولىك تۇراعىنا دەيىن ىڭعايلى بولۋى كەرەكتىگىنە توقتالدى.
شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ب.ناربەكوۆا قازىرگى تاڭدا زەينەت جاسىنا جەتكەن ازاماتتارعا «اسىل جۇرەك» الەۋمەتتىك-مەديسينالىق ورتالىعى جارتىلاي ستاسيونارلىق جاعدايىندا ارناۋلى الەۋمەتتىك قىزمەتتەر كورسەتىلىپ كەلەتىنىن باياندادى.
ورتالىققا كەلۋشىلەرگە جوعارى جانە ءبىرىنشى ساناتتى دارىگەر كارديولوگ، تەراپيەۆت، نيەۆروپاتولوگ جانە فيزيوتەراپيەۆت دارىگەرلەرى قىزمەت كورسەتەدى. سونىمەن بىرگە ەمدىك دەنەشىنىقتىرۋدان باستاپ يوگا، بي، بيليارد، ۇستەل تەننيسى، ترەناجەرلىق جاتتىعۋلار دا قاراستىرىلعان. قىزمەت الۋشىلاردىڭ كينو، سەنسورلىق بولمە، كىتاپحانادا دەمالۋعا دا مۇمكىنشىلىكتەرى بار. پسيحولوگ مامانىنان كەڭەس الىپ، پسيحولوگيالىق ترەنينگتەرگە قاتىسا الادى.
پىكىر قالدىرۋ