ءۇشىنشى مەگاپوليستەگى ءال-فارابي اتىنداعى قالالىق عىلىمي-امبەباپ كىتاپحانادا ەرەكشە ءىس-شارا ءوتتى. شىمكەنت قالالىق مادەنيەت، تىلدەردى دامىتۋ جانە ارحيۆتەر باسقارماسى ۇيىمداستىرعان «Night quest» ساياحاتىنا جاڭالىققا جانى قۇمار جاستار، وقىرماندار مەن قالا تۇرعىندارى قاتىستى.

كىتاپحانا ۇجىمى وسىلايشا جاستاردى زاماناۋي كۆەست ويىنى ارقىلى جاڭعىرعان، جاڭارعان ءال-فارابي كىتاپحاناسىمەن تانىستىرۋدى ماقسات تۇتىپ وتىر.

كرەاتيۆتى فورماتتا وتكەن ءىس-شاراعا قاتىسۋشىلار ءال-فارابيدىڭ شاكىرتى كالليگراف پەن كىتاپحانا شىراقشىسى – ءدارۋىشتىڭ، شىعىس ارۋىنىڭ باستاۋىمەن كۆەستتىڭ ءار كەزەڭىندە ءتۇرلى تاپسىرمالار ورىندادى. مىسالى، ساحنالىق كورىنىستەر، ساندىقتان قولجازبالار ىزدەۋ، عۇلامانىڭ شىعارماسىنان ۇزىندىلەردى تابۋ ارقىلى كەلەسى كەزەڭگە ءوتىپ وتىردى. «BOOKparty» بارىسىندا ۆيكتوريناعا قاتىسىپ، پىكىر الماستى.

– كىتاپحانامىزدىڭ اتاۋى وزگەرىپ قانا قويماي، ءىشى دە، مازمۇنى دا ءال-فارابي الەمىنە ساي بەزەندىرىلىپ، جاڭارتىلدى. بۇل جۇمىستار قالا اكىمى مۇرات دۇيسەنبەك ۇلى ايتەنوۆتىڭ تىكەلەي تاپسىرماسىمەن اتقارىلۋدا. وسىلايشا جاستارعا، قالا تۇرعىندارىنا الەم تانىعان ۇستازدىڭ رۋحاني، عىلىمي مۇراسىن ناسيحاتتاپ كەلەمىز. بىلتىر ءال-فارابيدىڭ 1150 جىلدىعىنا وراي حالىقارالىق عىلىمي كونفەرەنسيالار ءوتتى. الدا وسىنداي فورماتتاعى ءىس-شارالاردى جالعاستىرۋ جوسپارىمىزدا بار، – دەدى ءال-فارابي كىتاپحاناسى ديرەكتورىنىڭ مىندەتىن اتقارۋشى گۇلميرا الپىسبايەۆا.

بۇدان كەيىن بيبليوكافەدە ادەبيەتتىڭ ءتۇرلى جانرى بويىنشا كىتاپتار ۇسىنىلدى. سونىمەن قاتار، كوپشىلىك تۇنگى كينوسەانستا «ءابۋ ناسىر ءال-فارابي» انيماسيالىق ءفيلمىن تاماشالادى.