الماتى اكىمى باقىتجان ساعىنتايەۆتىڭ توراعالىعىمەن وتكەن اپپاراتتىق كەڭەستە مەگاپوليستى دامىتۋدىڭ، ونىڭ ىشىندە دەنساۋلىق ساقتاۋ جانە انا ءولىمىن بولدىرماۋ سالاسىنداعى وزەكتى ماسەلەلەر قارالدى.
قالالىق قوعامدىق دەنساۋلىق باسقارماسىنىڭ مالىمەتىنشە، انا ءولىمىنىڭ نەگىزگى سەبەپتەرىنىڭ اراسىندا COVID-19 جانە ەكستراگەنيتالدى اۋرۋلاردىڭ بولعانىن، COVID-19 سيمپتومدارى بايقالسا دا مەديسينا قىزمەتكەرلەرىنە كەش جۇگىنگەندەرىن كورسەتەدى.
انا ءولىمىن تومەندەتۋ ءۇشىن وتباسىن جوسپارلاۋ كابينەتتەرى جۇمىسىنىڭ تيىمدىلىگىن ارتتىرۋ بويىنشا شارالار قابىلدانۋدا، فەرتيلدى جاستاعى ايەلدەردى ديناميكالىق باقىلاۋ ەنگىزىلۋدە. سونىمەن قاتار، ايەلدەر كونسۋلتاسيالارىندا جۇكتى ايەلدەرگە مەديسينالىق كومەكتىڭ ساپاسىن ارتتىرۋ مىندەتى قويىلعان. قاشىقتان باقىلاۋ ارقىلى مساك دەڭگەيىندە تاۋەكەل توبىنداعى جۇكتى ايەلدەرگە مونيتورينگ جۇرگىزىلەتىن بولادى.
وسىعان وراي قالا اۋداندارى بويىنشا ۇيلەستىرۋشىلەر، قالانىڭ باس اكۋشەر-گينەكولوگى انىقتالدى، ايەلدەر كونسۋلتاسيالارىنىڭ، وتباسىن جوسپارلاۋ كابينەتتەرىنىڭ جۇمىسىنا مونيتورينگ جۇرگىزىلەدى. سونداي-اق، جۇكتى ايەلدەردى باعىتتاۋ الگوريتمدەرى جانە توتەنشە جاعدايلار كەزىندەگى ارەكەتتەر جاسالدى. ءبىرىنشى باسشىلاردىڭ جەكە جاۋاپكەرشىلىگى كۇشەيتىلدى. كوپبەيىندى ستاسيونارلاردى بوساندىرۋ ۇيىمدارىمەن كلاستەر فورماتىندا بىرىكتىرۋ جوسپارلانۋدا.
پەرزەنتحانالاردا كادرلار تاپشىلىعىن جويۋ جانە ولاردىڭ بىلىكتىلىگىن ارتتىرۋ ماقساتىندا رەزيدەنتۋرادا 2021-2023 وقۋ جىلدارى 6 اكۋشەر-گينەكولوگ دايارلىقتان وتەدى. ال، 2022-2024 جىلدارى – 4 مامان.
الماتى اكىمى ب. ساعىنتايەۆ انا ءولىمىن ازايتۋ ماقساتىندا ءىس-شارالار جوسپارىن ىسكە اسىرۋعا باقىلاۋدى كۇشەيتۋدى تاپسىردى. سونىمەن قاتار، قالا اكىمى بوساندىرۋ ۇيىمدارىنىڭ ماتەريالدىق-تەحنيكالىق بازاسىن جاقسارتۋ مىندەتىن العا قويدى. ول ءۇشىن اعىمداعى جانە كەلەسى جىلدارى قاجەتتى جابدىقتار ساتىپ الىنادى، ال 2023-2024 جىلدارى پەرزەنتحانالاردى زاماناۋي سورۋ-سىرتقا تاراتۋ جەلدەتكىشىن ورناتا وتىرىپ، كەزەڭ-كەزەڭىمەن رەكونسترۋكسيالاۋ قاراستىرىلعان.
پىكىر قالدىرۋ