قازاقستاندا جوعارى وقۋ ورىندارىنىڭ 19 ديسسەرتاسيالىق كەڭەسى بەلگىلەنگەن تالاپتاردى ساقتاماعاندىقتان 2021 جىلى ءوز قىزمەتىن توقتاتتى، دەپ حابارلادى ءبىلىم جانە عىلىم مينيسترلىگى.
قازىرگى ۋاقىتتا ۋنيۆەرسيتەتتەردە تاعى 13 ديسسەرتاسيالىق كەڭەس جابىلۋ الدىندا تۇر.
– كەڭەستەر قۇرىلعان دوكتورانتۋرانىڭ كەيبىر ءبىلىم بەرۋ باعدارلامالارى اككرەديتتەۋدەن وتپەگەن. ءبىرقاتار ۋنيۆەرسيتەتتە كەڭەستىڭ تۇراقتى قۇرامى بەكىتىلمەگەن ءارى كەڭەس قۇرامىندا 50% ۋاقىتشا مۇشەلەردىڭ بولۋى جونىندەگى تالاپتار ساقتالماعان. ءبىرقاتار ديسسەرتاسيالىق كەڭەستە رەسمي رەسەنزەنتتەردىڭ، ديسسەرتاسيالىق كەڭەس مۇشەلەرىنىڭ عىلىمي جۇمىستى باعالاۋى فورمالدى سيپاتقا يە جانە جۇمىس مازمۇنىنا ەگجەي-تەگجەيلى تالداۋ جۇرگىزىلمەيدى، – دەدى ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
سونىمەن قاتار، وسى جىلدىڭ ناۋرىز ايىندا ديسسەرتاسيالىق كەڭەستەردىڭ جۇمىس ىستەۋى بويىنشا جاڭا تالاپتار بەلگىلەنگەن. ولاردىڭ ىشىندە ديسسەرتاسيالىق كەڭەستەردە ۋاقىتشا مۇشەلەردىڭ – قورعالاتىن ديسسەرتاسيا تاقىرىبى بويىنشا سالا ماماندارىنىڭ بولۋى، رەسەنزەنتتەردىڭ داۋىس بەرۋگە قاتىسۋى جانە ولارعا قاتىستى شەكتەۋلەر تۋرالى ەرەجەلەر بار.
پىكىر قالدىرۋ