بۇگىن پالاتا سپيكەرى نۇرلان ءنىعماتۋليننىڭ توراعالىعىمەن ءماجىلىس بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.
ءماجىلىس ءتوراعاسى نۇرلان نىعماتۋلين اتاپ وتكەندەي، پالاتا دەپۋتاتتارى جالپى وتىرىستا سالىق كودەكسىنە جانە ونى قولدانىسقا ەنگىزۋ تۋرالى زاڭعا وزگەرىستەردى ءبىرىنشى وقىلىمدا تالقىلايدى.
پارلامەنت دەپۋتاتتارى ازىرلەگەن بۇل قۇجات كامەرالدىق باقىلاۋ ناتيجەلەرى بويىنشا سالىق داۋلارىن رەتتەۋدىڭ مىندەتتى سوتقا دەيىنگى ءتارتىبىن ەنگىزۋدى ۇسىنادى.
سونىمەن قاتار، ءماجىلىس دەپۋتاتتارى قۇقىق قورعاۋ ورگاندارى، پروكۋراتۋرا جانە سوت اراسىندا وكىلەتتىكتەردىڭ جانە جاۋاپكەرشىلىك ايماقتارىنىڭ اراجىگىن اجىراتا وتىرىپ، ءۇش بۋىندى مودەلدى ەنگىزۋ ماسەلەلەرىنە قاتىستى زاڭ جوباسىن ءبىرىنشى وقىلىمدا قاراماق.
بيۋرو وتىرىسىندا دەپۋتاتتار نازارىنا ءبىرقاتار راتيفيكاسيالىق زاڭ جوبالارى ۇسىنىلدى. ولار: قازاقستاننىڭ قىرعىز جانە تاجىكستان ەلدەرىمەن اسكەري-تەحنيكالىق كومەك كورسەتۋ جانە تاجىكستانمەن تاجىك-اۋعان شەكاراسىنا ىرگەلەس اۋدانداردا قاۋىپسىزدىكتى قامتاماسىز ەتۋدە اسكەري-تەحنيكالىق جاردەم كورسەتۋ تۋرالى كەلىسىمدەرى.
سونداي-اق، پالاتانىڭ الداعى جالپى وتىرىسىنا ەكىنشى وقىلىمدا ادام قۇقىقتارى جونىندەگى ۋاكىل تۋرالى، قىلمىستىق كودەكسكە ءولىم جازاسى ماسەلەلەرىنە قاتىستى زاڭ جوبالارى ۇسىنىلماق. وسى رەتتە داۋلاردى سوتتان تىس جانە سوتقا دەيىنگى رەتتەۋ ينستيتۋتتارىن دامىتۋ ماسەلەلەرى تۋرالى زاڭ جوباسى دا ەكىنشى وقىلىمدا قارالادى دەپ كۇتىلۋدە.
پىكىر قالدىرۋ