كەشقۇرىم شىمكەنت قالالىق №1ء-شى ارناۋلى الەۋمەتتىك قىزمەتتەر كورسەتۋ ورتالىعىندا تەكسەرۋ شاراسى جۇرگىزىلدى.

قالا اكىمىنىڭ ورىنباسارى ەرعالي بىلىسبەكوۆ ورتالىققا ەسكەرتۋسىز بارىپ، مۇمكىندىگى شەكتەۋلى ازاماتتارعا قىزمەت كورسەتۋ ساپاسىن باقىلادى. ەرعالي داۋلەتبەك ۇلى بىردەن جاتىن بولمەلەر،اسحانا، مونشا جانە دارى-دارمەك پەن ازىق-تۇلىك ساقتالعان قويمالاردى ارالاپ كوردى. ورتالىق ماماندارىنىڭ ايتۋىنشا، قازىرگى تاڭدا قوردا 5 ايلىق دارى-دارمەك قورى ساقتالعان. پاندەمياعا بايلانىستى بارلىق ساقتىق شارالارى قاداعالانۋدا.

قىزمەت ساپاسىن باقىلاعان قالا باسشىسىنىڭ ورىنباسارى ورتالىقتى ارالاۋ بارىسىندا ماماندارعا وسىندا قىزمەت الۋشى ءار ءبىر ازاماتقا قامقورلىق كورسەتىپ، ەمدىك-شارالارىندا جوعارى دەڭگەيدە كۇتىم جاساۋدى تاپسىردى.

- ءتورت مۇشەسى ساۋ بولسا، بۇل جاندار مۇنشالىقتى تاعدىر تالكەگىن تارتپاعان بولار ەدى. بۇل ازاماتتارعا ەرەكشە كۇتىم قاجەت. بولاشاقتى ەشكىم بولجاپ بىلە المايدى. سول سەبەپتى تاۋقىمەتتەرىن جۇرەكپەن سەزىنۋىمىز قاجەت. ولاردى مەديسينالىق جانە الەۋمەتتىك وڭالتۋ ارقىلى، اۋرۋشاڭدىق دەڭگەيلەرىن اسقىندىرماۋ باستى مىندەتتەرىڭىز. ارينە، ەڭبەكتەرىڭىز بەن جاۋاپكەرشىلىكتەرىڭىز وڭاي ەمەس. دەگەنمەن، تالاپ پەن ماقسات ايقىن ،-دەدى ەرعالي بىلىسبەكوۆ.

شىمكەنت قالاسىنداعى №1ء-شى ارناۋلى الەۋمەتتىك قىزمەتتەر كورسەتۋ ورتالىعى تاياۋدا ءبىرقاتار جاڭا مەديسينالىق قۇرالدارمەن تولىققان بولاتىن. ونىڭ ىشىندە ناۋقاسقا ىڭعايلى ءارى ساپالى ەم كورسەتۋگە ارنالعان كوپفۋنكسيونالدى كەرەۋەتتەر، قىزمەت الۋشىلاردى ەمحاناعا تاسىمالداۋعا ارنالعان ارنايى اۆتوكولىك جانە ودان بولەك كىر جۋعىش ماشينا، سالقىنداتقىشتار سىندى تۇرمىستىق قاجەتتىلىككە ارنالعان زاتتار دا جاڭارتىلدى.

بۇگىندە شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنا قاراستى №1ء-شى ارناۋلى الەۋمەتتىك قىزمەتتەر كورسەتۋ ورتالىعىندا 160 مامان جۇمىس ىستەۋدە. دارىگەرلىك قۇرام تەراپيەۆت، پسيحياتر، پسيحولوگ، ستوماتولوگ سىندى بىلىكتى مامانداردان جاساقتالعان. قابىرعاسى وسىدان 60 جىل بۇرىن قالانعان عيمارات بۇگىندە ءتىس دارىگەرى، ەمدىك ماسساج، فيتو بار جانە باسقا دا مەديسينالىق پروسەدۋرا كابينەتتەرىمەن قامتىلعان. جالپى، جاسى 18-دەن اسقان، I - II توپتاعى پسيحونيەۆرولوگيالىق اۋرۋلارى بار مۇمكىندىگى شەكتەۋلى ازاماتتارعا 8 باعىت بويىنشا قىزمەت تۇرلەرى كورسەتەدى. ورتالىقتا سونداي-اق، زاماناۋي تەحنيكالارمەن جابدىقتالعان 3 مەديسينالىق بەكەت، 2 ترەناجەرلىق زال جاساقتالعان.قازىرگى تاڭدا ورتالىقتا 225 ادام ەم قابىلداۋدا.

ارالاۋ بارىسىندا ءمالىم بولعانىنداي،ورتالىققا 50 ورىندىق قوسىمشا عيمارات قاجەت.قازىرگى تاڭدا جوبالىق سمەتالىق قۇجاتىن دايىنداۋ جۇمىستارى جۇرگىزىلۋدە.