شىمكەنتتە تۇرعىنداردىڭ ساپالى ءارى ءتيىمدى، ۋاقىت ۇنەمدەي وتىرىپ قىزمەت الۋىنا جاعداي جاساۋ ماقساتىندا «I-shymkent» ەلەكتروندى پورتالى ىسكە قوسىلدى. وندا كوممۋنالدىق شارۋاشىلىق قىزمەتتەر اۆتوماتتاندىرىلعان رەجيمدە جۇمىس جاسايدى. 50 قىزمەت پەن سەرۆيستەر ىسكە قوسىلعان.

قالا اكىمى مۇرات ايتەنوۆ جىل سوڭىنا دەيىن تاعى 20 قىزمەت قوسىلاتىنىن ايتتى. ماسەلەن تۇرعىندار «ەنەرگوپوتوك»، «وڭتۇستىك جارىق ترانزيت»، «سۋ-رەسۋرستار ماركەتينگى» سەكىلدى كوممۋنالدىق قىزمەت كورسەتۋشىلەرگە ءوتىنىش قالدىرا الادى، كەڭەس الۋ، مەملەكەتتىك جانە كاسىپكەرلىك قىزمەتتەر، ازاماتتاردى سيفرلاندىرۋ باعىتىندا ونلاين وقىتۋ جۇيەگە ەنگەن. الداعى ۋاقىتتا «109 ايكومەك-شىمكەنت» ورتالىعىنىڭ جۇمىسى دا بىرىكتىرىلمەك.

اتالعان قىزمەتتەردى وففلاين تۇردە كورسەتەتىن فرونت-وفيس تە اشىلىپ جاتىر. ول جەردە 10 قىزمەتكەر جۇمىس اتقاراتىن بولادى. ناتيجەسىندە ازاماتتار ونلاين جانە وففلاين دا قىزمەت الۋىنا مۇمكىندىك تۋادى.