شىمكەنت قالاسىنىڭ اكىمى مۇرات ايتەنوۆ جۇمىس كەستەسىنە سايكەس بۇگىن "كومەشبۇلاق" اۋىز سۋ ماگيسترالىنىڭ قۇرىلىسىن قاداعالادى.

بيىل قالانىڭ اۋىز سۋ ينفراقۇرىلىمىن جەتىلدىرۋگە 16 ملرد تەڭگە باعىتتالىپ، 3 ماگيسترالدى، اۋىز سۋ تاسىمالىنا تاۋەلدى 7 ەلدى مەكەنگە سۋ جەتكىزۋ، كەستەمەن بەرىلەتىن 2 ەلدى مەكەندە ىشكى ورامدىق سۋ جۇيەلەرىنىڭ قۇرىلىستارى اتقارىلدى. ناتيجەسىندە جىل سوڭىنا دەيىن 25 مىڭ تۇرعىن ساپالى اۋىز سۋمەن قامتىلىپ، قالانىڭ جالپى قامتىلۋ كورسەتكىشى 95،6%-دان 98%-عا جەتەتىن بولادى.

جالپى ۇزىندىعى 4،48 شاقىرىمدى قۇرايتىن جوبانىڭ قۇرىلىس الاڭىندا سالا جەتەكشىلەرىمەن جۇمىس جيىنىن وتكىزگەن مۇرات دۇيسەنبەك ۇلى، مەملەكەت باسشىسى بيىلعى جولداۋىندا حالىقتى اۋىز سۋمەن قامتۋ بويىنشا ناقتى مىندەت قويعانىنا توقتالىپ، بۇل سالادا 2023 جىلعا دەيىن قالانىڭ اۋىز سۋمەن قامتىلۋ كورسەتكىشىن 100%-عا جەتكىزۋ مەجەلەنگەنىن ايتتى.

اتقارىلعان ىستەردىڭ ساپاسىن ايرىقشا باقىلاۋدا ۇستاۋدى، قۇرىلىس نىساندارىن بەلگىلەنگەن مەرزىمدەرىندە اياقتالۋىن قاداعالاۋدى تاپسىردى.