بۇگىن اياجان ەدىلوۆانىڭ ولىمىنە قاتىستى باستى سوت تالقىلاۋى باستالدى. سوت الماتىنىڭ اسا اۋىر قىلمىستىق ىستەر جونىندەگى مامانداندىرىلعان اۋدانارالىق سوتىندا جابىق رەجيمدە وتەدى.

– ءىستى قاراۋ ساعات 10-عا جوسپارلانعان. ءىس شامامەن 30 تومنان تۇرادى، 30-عا جۋىق ساراپتاما جاسالدى، –  دەدى اياجان وتباسىنىڭ وكىلى قادىرجان عالىمجان ۇلى.

ادۆوكات ىسكە قاتىستى وزگە مالىمەت بەرمەگەن.

ءىس سوتقا 20 قازاندا تۇسكەن. الدىن الا تىڭداۋدا سوتتالۋشى القابيلەر سوتىنان باس تارتتى. ەندى تارتىپكە ساي ۇكىمدى سۋديا شىعارادى. 

ەسكە سالساق، 2021 جىلدىڭ 19 ناۋرىزىندا جۇمىستان شىقان اياجان ەدىلوۆا، سول كۇيى ۇيىنە ورالماعان. قىزدىڭ جوعالعانى تۋرالى حابار 20 ناۋرىزدا تارادى. تانىستارى ونى سوڭعى رەت جۇمىستا كورگەن. ىزدەۋ جۇمىستارى بىرنەشە كۇنگە سوزىلىپ، 22 ناۋرىزدا ونى اسا قاتىگەزدىكپەن ولتىرگەنى بەلگىلى بولدى. بويجەتكەننىڭ بولشەكتەنگەن دەنەسى نۇركەنت ىقشاماۋدانىنداعى پاتەرلەردىڭ بىرىنەن تابىلعان. 

اياجاننىڭ ولىمىنە كۇدىكتى رەتىندە ەر ادام ۇستالعان. ول جابىرلەنۋشىمەن بىرگە كىرەبەرىستە بەينەباقىلاۋ كامەرالارىنا ءتۇسىپ قالعان. كۇدىكتى 1993 جىلعى تۇركىستان وبلىسىندا تۋماسى.