بيىل شىمشاھاردا 21،9 شاقىرىمدىق 9 ماگيسترالدى كوشەدە ورتاشا جوندەۋ جۇمىستارى جۇرگىزىلۋدە. ولاردىڭ قاتارىندا ب.مومىش ۇلى، س.بايتەرەكوۆ، ت.رىسقۇلوۆ، ج.تاشەنوۆ، ع.يليايەۆ، ج.شاياحمەتوۆ، اقنازار حان جانە كلارا سەتكين كوشەلەرى بار.

قالالىق جولاۋشىلار كولىگى جانە اۆتوموبيل جولدارى باسقارماسىنىڭ دەرەگىنشە، شىمكەنتتەگى باستى ماگيسترالدى، كولىك اعىنى جوعارى كوشە بولىپ تابىلاتىن س.بايتەرەكوۆ كوشەسىندە جاياۋ جۇرگىنشىلەر جولى مەن ۆەلوجول سالۋ جۇمىستارى اياقتالۋعا جاقىن. جاۋاپتى مەردىگەر مەكەمە – «پروفيلەند» ج ش س.

جوندەلەتىن كوشەنىڭ ۇزىندىعى 2 شاقىرىمدى قۇرايدى. جاياۋ جۇرگىنشىلەر جولىنا ءمارمار تاس قوسىمشاسىمەن جاسالعان جولاياق توسەنىشى قويىلعان. مەردىگەر كومپانيا وكىلىنىڭ ايتۋىنشا، ول ۇزاق مەرزىمگە شىدامدى ءارى قىستا تايعاق بولمايدى. سونىمەن بىرگە، جاڭا ورىندىقتار مەن قوقىس جاشىكتەرى ورناتىلعان.

بۇگىندە قۇرىلىس جۇمىستارىنىڭ 80 پايىزى بىتكەن. جۇمىستار كۇز مەزگىلىنىڭ سوڭىنا دەيىن تولىعىمەن اياقتالىپ، پايدالانۋعا بەرىلەدى دەپ جوسپارلانىپ وتىر.