سالىق كودەكسىنە ەنگىزىلەتىن جاڭا نورمالار كاسىپكەرلەرگە سالىق جۇكتەمەسىن ارتتىرمايدى. بۇل تۋرالى بۇگىن ءماجىلىستىڭ جالپى وتىرىسىندا پالاتا ءتوراعاسى نۇرلان نىعماتۋلين ايتتى.

دەپۋتاتتار سالىق كودەكسىنە ەنگىزىلەتىن وزگەرىستەر تۋرالى زاڭ جوباسىن ءبىرىنشى وقىلىمدا قاراۋ بارىسىندا ءموبيلدى تولەمدەردى رەتتەۋگە قاتىستى نورمالاردى قاراستىردى. 

ءماجىلىس دەپۋتاتتارى تاراپىنان تۇتىنۋشىلار مەن كاسىپكەرلەر ءۇشىن جاڭا نورمانى قابىلداۋدان نە كۇتىلەتىن جانە كاسىپكەرلەرگە سالىناتىن سالىق جۇكتەمەسى تۋرالى ماسەلەلەر كوتەرىلدى.

نۇرلان نىعماتۋلين اتالعان نورما بويىنشا سالىقتىڭ جاڭا ءتۇرى ەنگىزىلمەيتىنىن العا تارتىپ، كاسىپكەرلەرگە سالىق جۇكتەمەسى وزگەرمەيتىنىن ايتتى.

سونىمەن قاتار، وتىرىس بارىسىندا دەپۋتاتتار كولىك سالىعىنا قاتىستى ءبىرقاتار ماسەلەلەردى ورتاعا سالدى. اتاپ ايتقاندا، بۇگىندە «گازەلدەرگە» سالىق سالۋ اۆتوموبيل قوزعالتقىشى كولەمىنە ەمەس، جۇك كوتەرگىشتىگىنە بايلانىستى بەلگىلەنگەن مولشەر بويىنشا تولەنەدى. بۇل نورما ەلىمىزدەگى 96 مىڭ اۆتوكولىككە قاتىستى بولماق. وسىعان بايلانىستى اتالعان نورمانىڭ 2021 جىلعى 1 قاڭتاردان باستاپ كۇشىنە ەنۋى ۇسىنىلادى.

 ايتا كەتەتىن جاعداي، اۆتوكولىك سالىعىن تولەۋ مەرزىمى زاڭدى تۇلعالار ءۇشىن 2021 جىلدىڭ 5 شىلدەسىندە اياقتالسا، جەكە تۇلعالار مەن جەكە كاسىپكەرلەر ءۇشىن مەرزىمى 2022 جىلعى 31 ناۋرىزدا بىتەدى. سوندىقتان دا سالىقتى تولەگەن اۆتوكولىك يەلەرى ءۇشىن قايتا ەسەپتەۋلەر قاجەت.

وسىعان سايكەس، ءماجىلىس ءتوراعاسى اۆتوكولىكتىڭ مودەلىنە قاتىستى سالىق 2 ەسەگە، ال جەكەلەگەن جاعدايلاردا 6 ەسەگە دەيىن ازاياتىنىن ايتتى. ءار اۆتوكولىك يەسى ءۇشىن سالىق 5 مىڭ تەڭگە مەن 115 مىڭ تەڭگە كولەمى ارالىعىندا قايتارىلاتىن بولادى.

نۇرلان نىعماتۋلين اتاپ وتكەندەي، ءقازىر ەڭ باستىسى مەملەكەتتىك ورگاندار وسى زاڭنامالىق نورمانىڭ رەتروسپەكتيۆتىلىگىن ەسكەرە وتىرىپ، بارلىق قاجەتتى ەسەپتەۋلەردى جەدەل، بيۋروكراتياسىز جۇرگىزۋ كەرەك.  

وسىعان ساي، پالاتا سپيكەرى 1،5 ايدان كەيىن زاڭ كۇشىنە ەنەتىنىن، 90 مىڭنان اسا اۆتوكولىك يەسىنىڭ 2021 جىلعا ارنالعان سالىعىن قايتا ەسەپتەيتىنىنە توقتالىپ، بۇل ەسەپتەۋلەر اۆتوكولىك يەلەرىنىڭ قاتىسۋىنسىز وتەتىنىن، سوندىقتان، ازاماتتار وسى جايىندا ەرتەرەك ءبىلۋ كەرەكتىگىن ايتتى. 

نۇرلان ءنىعماتۋليننىڭ پىكىرىنشە، بارلىعى اۆتوماتتى تۇردە جاسالاتىنىن، ەشقايدا بارۋدىڭ جانە ءوتىنىش جازۋدىڭ قاجەتى جوق ەكەنى تۋرالى حالىقتى الدىن الا حاباردار ەتۋ قاجەت. 

ءقازىر ءتيىستى دەڭگەيدە ءتۇسىندىرۋ جۇمىستارى ۇيىمداستىرىلماسا، ادامدار حالىققا قىزمەت كورسەتۋ ورتالىقتارىنا بارىپ، كولل-ورتالىقتارعا ۇزبەي قوڭىراۋ شالىپ، مەملەكەتتىك ورگانداردىڭ بلوگتارىنا وتىنىشتەر قالدىرادى، - دەدى پالاتا سپيكەرى.

ايتا كەتۋ كەرەك، زاڭ جوباسى موبيلدىك تولەمدەردى رەتتەۋ، سالىق تولەۋشىنىڭ پاسپورتىن ەنگىزۋ جانە جۇك اۆتوموبيلدەرى ءۇشىن بەلگىلەنگەن مولشەرلەمەلەر بويىنشا جەكەلەگەن كولىك قۇرالدارىنا سالىقتى ەسەپتەۋ قۇقىعىن بەرۋ جانە باسقا دا ءبىرقاتار جاڭا نورمالاردى قامتىعان.