شىمكەنت قالاسىنىڭ ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى ب.بۋلاتبەكوۆ قالا اكىمدىگىنىڭ @akimat_shymkent ينستاگرام پاراقشاسىندا تىكەلەي ەفيردە سۇحبات بەردى.

باسقارما باسشىسى قالادا ەلەكتر قۋاتىنىڭ ءجيى ءسونۋىنىڭ نەگىزگى سەبەپتەرىنە توقتالىپ، جالپى قالانى ساپالى ەلەكتر قۋاتىمەن جانە اۋىزسۋمەن قامتۋ جۇمىستارىنىڭ بارىسىن باياندادى. تىكەلەي ەفير بارىسىندا تۇرعىندار تاراپىنان الەۋمەتتىك جەلى ارقىلى كەلىپ تۇسكەن ساۋالدارعا جاۋاپ بەردى.

شاھاردا 11 قاراشادان باستاپ ەلەكتر ەنەرگياسى شەكتەلمەيدى. قالا تۇرعىندارىنا قولايسىزدىق تۋدىرعان بۇل ماسەلەنى شەشۋ ماقساتىندا جامبىل گرەس-تەن قوسىمشا 70 مۆت ەلەكتر ەنەرگياسىن الۋعا كەلىسىمشارت ءتۇزىلدى.

– قالا تۇرعىندارىن ساپالى ەلەكتر قۋاتىمەن قامتۋ ماقساتىندا بيىل بارلىعى 16 ەلدىمەكەندە (بارلىعى 20 نىسان) قۇرىلىس جۇمىستارى قولعا الىندى. بۇگىنگە دەيىن قاراباستاۋ ەلدىمەكەنىندەگى 100-گە جۋىق ابونەنت ەلەكتر قۋاتىمەن قامتىلدى. سونداي-اق، «1-م-1» قوسالقى ستانسياسىنىڭ قۇرىلىسىن اياقتاپ، قازىرگى ۋاقىتتا ىسكە قوسۋعا دايىندىق جۇرگىزىلۋدە. ونىڭ ناتيجەسىندە، اسار-2 ەلدىمەكەنى تۇرعىندارىن ساپالى ەلەكتر قۋاتىمەن قامتاماسىز ەتەتىن بولامىز، – دەدى ب.بۋلاتبەكوۆ.

جالپى جىل سوڭىنا دەيىن، 7 ەلدىمەكەندە (دوستىك، جالىن، اقجار، ىنتىماق-2، ايكول، يگىلىك، تاۋەلسىزدىككە 20 جىل) قۇرىلىس جۇمىستارى اياقتالىپ، 21،3 مىڭعا جۋىق ادام ساپالى ەلەكتر قۋاتىمەن قامتاماسىز ەتىلەدى.

سونداي-اق، باسقارما باسشىسىنىڭ مالىمدەۋىنشە، قالا تۇرعىندارىن ساپالى اۋىزسۋمەن قامتۋ ماقساتىندا بارلىعى 14 نىساننىڭ قۇرىلىسى جۇرگىزىلۋدە. قازىرگى ۋاقىتتا تۇران، ىنتىماق-2، اقتاس-2 جانە ساۋلە (276 – ورام)، جاڭاتالاپ، اسار-2 ەلدىمەكەنىندەگى قۇرىلىس جۇمىستارى اياقتالىپ، تۇرعىنداردى سۋعا قوسۋ جۇمىستارى باستالدى.

باتىس، سولتۇستىك ساياجاي جانە نۇرتاس ەلدىمەكەندەرىندە سۋ قۇبىرى تولىق جۇرگىزىلىپ، قازىرگى ۋاقىتتا قۇبىرلار سىناقتان وتكىزىلدى جانە سۋ ەسەپتەگىش قۇرىلعىسى ورناتىلۋدا. اتالعان جۇمىستار قاراشا ايىنىڭ سوڭىنا دەيىن اياقتالىپ، اتالعان ەلدىمەكەنگە دە سۋ بەرۋ جۇمىسى باستالادى. 2021 جىلدىڭ جوسپارىنا سايكەس، قالادا اۋىزسۋىن تاسىمالدايتىن ەلدىمەكەننىڭ بارلىعى 100 پايىز قامتىلىپ، ساپالى اۋىزسۋ بەرىلەدى