شىمكەنت قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى تاراپىنان الەۋمەتتىك قولداۋ كورسەتۋ ساناتىنداعى ازاماتتارعا شيپاجايلارعا تەگىن جانە جەڭىلدىكپەن جولدامالار بەرىلەدى.
بۇگىندە 4126 جولداما زەينەتكەرلەرگە شيپاجايدا ەم قابىلداۋى ءۇشىن بەرىلدى.
بيىل كەزەكتە تۇرعان زەينەت جاسىنداعى ازاماتتاردى شىمكەنت قالاسىنىڭ "دەنساۋلىق" شيپاجايىنا، تۇلكىباس اۋدانىنىڭ "اقسۋ-جاباعىلى" جانە تاراز قالاسىنىڭ "ايشا ءبيبى" شيپاجايلارىنا جىبەرىلۋدە. شيپاجايدان ەم الىپ كەلگەن شىمكەنتتىك زەينەتكەرلەردىڭ ايتۋىنشا «ايشا ءبيبى» شيپاجايىنىڭ ساز بالشىقپەن ەمدەۋ ءتۇرى كوپشىلىكتىڭ كوڭىلىنەن شىعۋدا.
قالالىق جۇمىسپەن قامتۋ جانە الەۋمەتتىك قورعاۋ باسقارماسى ارداگەرلەرمەن جۇمىس جونىندەگى ءبولىمنىڭ مالىمەتىنشە، ساناتوريالىق-كۋرورتتىق ەمدەۋ ۇلى وتان سوعىسىنىڭ قاتىسۋشىلارىنا جانە ولارعا تەڭەستىرىلگەن تۇلعالارعا، زەينەتكەرلىك جاستاعى "التىن القا"، "كۇمىس القا" يەگەرلەرىنە تەگىن بەرىلەدى. ال، زەينەتكەرلەرگە جولداما قۇنىنىڭ 50 پايىزىن تولەۋمەن بەرىلەدى.
شيپاجايلارعا جولداما بەرىلۋ جۇمىستارى مەملەكەتتىك تاپسىرىس شەڭبەرىندە جۇزەگە اسىرىلادى. جولداما الۋ ءۇشىن بايتەرەكوۆ كوشەسى، 89 مەكەن-جايى بويىنشا قالالىق جۇمىسپەن قامتۋ جانە الەۋمەتتىك قورعاۋ باسقارماسىنا ءوتىنىش قالدىرۋ قاجەت. جولداما كەزەك بويىنشا بەرىلەدى. كەزەككە تۇرۋ ءۇشىن جەكە كۋالىك جانە 068 نىسانىنداعى انىقتاما قاجەت.
پىكىر قالدىرۋ