ءال-فارابي اۋدانى كوركى مەن سانيتارلىق تازالىعى باستى نازاردا. اۋدانداعى كوپ قاباتتى ۇيلەردىڭ سانيتارلىق-تازالىق جۇمىستارى مەن اۋلا، ىشكى ورام جولدارىنىڭ تازالىعىن قامتۋ 7 سەكتورعا ءبولىنىپ اتقارىلادى. ءار ۋاۋماققا اۋدان اكىمى اپپاراتىنىڭ جاۋاپتى ماماندارى بەكىتىلگەن.

مەردىگەر «نۇرەكە ازيا بيزنەس» ءجشس-ى №1، 3، 7 اۋماققا جاۋاپتى. ال «ايدىنبەك» مەكەمەسى №2، 4، 5، 6 اۋماقتاعى كوپقاباتتى ۇيلەردىڭ اۋلاسىن اپتاسىنا 4 رەت، جەكە سەكتوردا ەكى رەت تازالىق جۇمىسىن جۇرگىزەدى.

ورتالىق كوشەلەردى جۋۋ، ارنايى تەحنيكامەن سىپىرۋ، جينالعان لاس سۋدان ارىلتۋ، قىستا قاردان تازارتۋ، تايعاققا قارسى ينەرتتى ماتەريالداردى سەبۋ، ايالدامالاردى، اياقجولداردى، يرريگاسيالىق ارىقتاردى، جيەكتاستار جانىن تازالاۋ جۇمىسى مەردىگەر «لتد تۇرمىس» تاراپىنان اتقارىلۋدا. اۋدانداعى تازالىعىنا جاۋاپتى مەردىگەرلەر جىل باسىنان بەرى قالانىڭ قوقىس پوليگونىنا 59 651 م3 قوقىس شىعارعان.

اۋداننىڭ باستى 71 كوشە بويىنداعى اعاشتار پەن گۇلدەردى جالپى جاسىل-جەلەكتەردى «بيۋلد ستروي» ءجشس-ى كۇتىپ، ۇستايدى.

قالانىڭ جاز مەزگىلىندە گۇلدەنۋى ءۇشىن 166 695 دانا جازدىق گۇل (سيننيا، شافران، بونانزا، ۆەربينيا، گۆوزديكا، پەتۋنيا، سالۆيا، شابو، پەتۋشوك) ەگىلدى. كوپجىلدىق گۇلدەردەن، بۇتالار مەن راۋشانداردان تۇزىلگەن سان الۋان گۇلزارلار – ميكسبوردەرلەر جاسالۋدا.

بيىل ورتالىق كوشەلەرگە كوپجىلدىق گۇلدەردى وتىرعىزۋعا باسىمدىق بەرىلدى. جىل باسىنان 18 525 ءتۇپ روزا گۇل كوشەتى مەن 184 مىڭعا جۋىق ءتۇرلى-تۇستى كوپجىلدىق گۇل كوشەتتەرى ەگىلدى. كۇز مەزىلى كەلگەنىنە قاراماي سۋىققا ءتوزىمدى كوپجىلدىق گۇلدەردىڭ اسەمدىگى قالا كوركىنە كورىك قوسىپ، تۇرعىنداردىڭ كوزايمىنا اينالدى.