شىمكەنتتە اۋىل شارۋاشىلىعى كاسىپكەرلەرى جانە وڭتۇستىك – باتىس مال جانە وسىمدىك شارۋاشىلىعى عىلىمي-زەرتتەۋ ينستيتۋتى وكىلدەرىنىڭ قاتىسۋىمەن «شىمكەنت قالاسىنىڭ جاسىل بەلدەۋىنىڭ سۇر توپىراقتارىندا ءسابىزدى اۋلادا ءوسىرۋ تەحنولوگياسىن ەنگىزۋ» جوباسى بويىنشا سەمينار-كەڭەس ءوتتى.

جيىننىڭ ماقساتى – شىمكەنتتىڭ جاسىل بەلدەۋىنىڭ سۇر توپىراقتارىندا ءسابىزدىڭ قارقىندى سورتتارىن ءوسىرۋدىڭ تاراقتى تەحنولوگياسىن ەنگىزۋ، تامشىلاتىپ سۋعارۋ ءادىسىن قولدانۋ، ەكولوگيالىق تازا ءونىم الۋ جانە تۇرعىنداردىڭ ءوزىن-وزى جۇمىسپەن قامتۋ.

قالاداعى جەكە تۇرعىن ءۇي تەلىمدەرىنىڭ 60 پايىزىندا ىرگەلىك جەرلەرى بار. سول جەرلەرگە يننوۆاسيالىق تاجىريبەنى قولدانا وتىرىپ، ءسابىز ەگۋ ارقىلى وتباسىلىق كاسىپتى جۇزەگە اسىرۋعا دا بولادى. سەبەبى اسحانالىق ءسابىز – قۇرامىندا دارۋمەنى بار جەتەكشى كوكونىس داقىلى عانا ەمەس، تەحنيكالىق داقىل رەتىندە دە ەكونوميكالىق ماڭىزعا يە.

وڭتۇستىك – باتىس مال جانە وسىمدىك شارۋاشىلىعى عىلىمي-زەرتتەۋ ينستيتۋتى جاڭا تەحنولوگيانى «BES-TULIK» شارۋاقوجالىعىنا ەنگىزبەك. ناتيجەسىندە اۋىل شارۋاشىلىعى ءوندىرىسىن ءارتاراپتاندىرۋ جانە جەكە قوسالقى شارۋاشىلىقتاردى دامىتۋعا مۇمكىندىك تۋادى.