شىمكەنت قالاسىندا بيىل «نۇرلى جەر» مەملەكەتتىك باعدارلاماسى اياسىندا 25 كوپپاتەرلى تۇرعىن ۇيگە كۇردەلى جوندەۋ جۇمىستارىن جۇرگىزۋ قاراستىرىلعان. ناتيجەسىندە ەسكىرگەن ۇيلەردىڭ شاتىرى مەن ينجەنەرلىك كوممۋنيكاسيا جۇيەلەرى جاڭارتىلىپ، جەرتولەلەرى كۇردەلى جوندەۋدەن وتۋدە.

قالا اكىمىنىڭ ورىنباسارى ەرعالي بىلىسبەكوۆ كۇردەلى جوندەۋدەن ءوتىپ جاتقان ۇيلەردى ارالاپ، تۇرعىندارمەن كەزدەستى. جانگەلدين كوشەسىندەگى شيرەك عاسىردان اسا ۋاقىت جوندەۋ جۇمىستارى جۇرگىزىلمەگەن №12 ا ءۇي تولىعىمەن قايتا جاڭعىرتىلىپ وتىر. ەرعالي داۋلەتبەك ۇلى ارالاۋ بارىسىندا جاۋاپتى سالا جەتەكشىلەرى مەن جوندەۋ جۇمىستارىن جۇرگىزىپ جاتقان مەكەمە قىزمەتكەرلەرىنە ءبىرقاتار تاپسىرما بەردى.

- ەڭ باستىسى حالىقتىڭ جايلىلىعى ءۇشىن كۇردەلى جوندەۋ جۇمىستارىنىڭ بارلىق تالاپقا ساي ساپالى دا ءقاۋىپسىز بولۋى مىندەتتى. حالىق زارداپ شەكپەۋى كەرەك. ءار ءىستى ءوز ۇيلەرىڭىزگە جاساعانداي ورىنداڭىزدار. ءبىز ءۇشىن تۇرعىنداردىڭ كەلىسىمى مەن ريزاشىلىعىنان ماڭىزدى ەشتەڭە جوق،- دەدى قالا باسشىسىنىڭ ورىنباسارى.

قاراسۋ شاعىناۋدانىنداعى №82 ءۇيدىڭ ءتورايىمى ۆالەنتينا بوندارەنكو تۇرعىن ءۇيدىڭ قايتا جاڭعىرتىلىپ، ابدەن توزىعى جەتكەن جەرلەرىنىڭ جاڭارتىلعانىنا قۋانىشتى. ول كوپ جاعدايدا ورتاڭعى قاباتتا تۇراتىن ازاماتتار جەرتولە نەمەسە شاتىردىڭ جوندەۋ جۇمىستارىنا قاتىسقىلارى كەلمەيتىندىگىن، كوممۋنالدىق جۇيە ىستەن شىعىپ، شاتىردان سۋ وتسە جوندەۋ جۇمىستارى بۇكىل ءۇي تۇرعىندارىنا ورتاق شارۋا ەكەنىن تۇسىنگىسى كەلمەيتىندەر دە بار ەكەنىن ايتتى.

كۇردەلى جوندەۋ جۇمىستارى ءۇشىن جەرگىلىكتى بيۋدجەت ەسەبىنەن قاراجات ءبولىنىپ، قايتارىمدى نەگىزدە جۇرگىزىلۋدە. ەرعالي بىلىسبەكوۆ جاۋاپتى سالا ماماندارىنا كەلەسى جىلى كۇردەلى جوندەۋ جۇمىستارىن جىل سوڭىنا قالدىرماي ەرتە اياقتاۋدى تاپسىردى.