شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن سانيتارلىق-ەپيدەميولوگيالىق احۋال جونىندەگى شتاب وتىرىسى ءوتتى. جيىندا قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ شاھارداعى ەپيدەميولوگيالىق احۋالدى جانە ءبىرقاتار وزەكتى ماسەلەلەردى باياندادى.

قالادا ەپيدەميولوگيالىق احۋال تۇراقتى. شىمكەنت قالاسى بۇگىنگى تاڭدا ەپيدەميولوگيالىق جاعداي بويىنشا «سارى ايماقتا» ورنالاسقان.
باسقارما باسشىسىنىڭ ايتۋىنشا، قالادا 40-تان استام بەكەتتە ۆاكسينالاۋ جۇرگىزىلۋدە. ەگۋ ناۋقانى باستالعالى بارلىعى 558 108 ادام ۆاكسينالاندى. ونىڭ ىشىندە 526 313 ادام ەكپەنىڭ ەكى كومپونەنتىن الدى.
ازاماتتارعا ۆاكسينانىڭ سپۋتنيك، QazCOVID-In، Hayat-Vax، CoronaVAC، Vero CELL تۇرلەرى ەگىلۋدە.

قالا اكىمدىگى جانىنان اشىلعان call-center تاۋلىك بويى جۇمىس ىستەۋدە. بۇگىندە قالادا ASHYQ جوباسىنا قوسىلعان بيزنەس سۋبەكتىلەرىنىڭ سانى 8 828-گە جەتتى. 715 تۇرعىننان «سارى» ستاتۋس، 2030 تۇرعىننان «قىزىل» ستاتۋس انىقتالعان.

سونداي-اق، بۇگىنگە دەيىن بارلىق اۋدان بويىنشا 47 208 نىسانعا تەكسەرۋ جۇمىستارى جۇرگىزىلدى. ونىڭ ىشىندە 2674 كارانتيندىك تالاپتاردى بۇزۋ فاكتىلەرى تىركەلىپ وتىر.

قالا اكىمى تۇرعىندارعا ۆاكسينالاۋدىڭ ماڭىزدىلىعىن ءتۇسىندىرۋ جۇمىستارىن كۇشەيتۋ قاجەتتىگىن مالىمدەدى.